初雪日誌

這幾天轉冷，溫度跌至零下；並且風猛。

今朝和大人歎茶，鬼咁肚餓，且雪櫃已幾乎清倉，叫夠8個點心 ~ 飯都兩盅。
歎完茶逛超市，又見青斑大造上市而減價，兩兜友心有靈犀，想打邊爐。

人丁單薄食得冇咁過癮，致電問廚神使唔使煮飯...
回報說大伯今日上來，打算煲豬肺湯，還叫埋我地上去食飯
有得食一向唔會托手踭，於是原議暫緩

哈，臨收線還特別交帶 "早尐上嚟開枱..."

  中午出發，順道斬隻燒鴨

今日廚神私房菜菜單

大人落場
自己拎埋尐功課上去溫習備戰 ~ 今日冇覺好瞓咯

海蜇大豆芽

  

腐竹豬肺湯(忘記落薏米，也沒落白果)
阿媽以前常煲，我地鍾意飲
大人唔食豬肺，屋企煲則用豬肚代之

以前靚仔時食過不同製法的禾花雀
是真正的的禾花雀，並非後來的那些充頭貨  ~
大小略如手指公大尐(?)，食四方的口型可以一啖一隻，骨軟肉滑，冇渣(口累)的!!
炸、煀、潤腸釀焗 ~ 都一樣好食。
俱往矣...

鵪鶉嘛...肉質真有霄壞之別...哈哈
沒辦法，好多好多嘢，現在都食唔番的了
唯有節饞順變囉...

 塞截潤腸入去腹腔

廚神買了兩條黃鱔，咁大碌嘅?
都唔知邊度嚟的，肉質無乜味
以前香港的好食好多
不過我始終喜歡食白鱔多尐

 

飯後再戰四圈
我繼續做功課 ~ 飲了一大杯紅酒，開始想瞌眼瞓...

戰罷(飯前換手我打了幾圈，要輸幾十蚊找數，嘿...)嗱嗱聲趕返屋企開OT

臨出門口, 廚神大伯畀C$15我，托我同佢買第一場連贏 ~ 1-2-3 鐵三角
"唔買位置Q呀?"  "唔買..."
每注...? 點計? 叫大人心算，計匯率7.5喇 = HK$112.X
當HK$120；即每注$40

出嚟...嘩，入冬的初雪，都幾勁下，座駕咁款

要同架矇面車清理個面罩先行得
廚神大伯連雪掃都沒放在車上
順便同佢掃埋，義不容辭

先著車、開暖氣，然後掃雪 ~ 出面好鬼凍，求其掃到睇到就算
大人一個箭步，縮咗上車先，施施然影相

揸得小心翼翼，好在晚上車少，不致趕唔切。
匆匆開機、印賠率、同大伯落注，自己亦當然買埋一份 ~刨到的所謂心水，
自己的心水冷馬又跑第四，脹然，冇錢收。
落筆打三更，大伯同我都輸了。

跑了三場，已經眼瞓，買多兩場過關，搵周小姐謦欬去了...。