半個多月前不知如何，閃親左側後腰某處... :(
發覺唔妥之後...，頭三、四日行動好似機械人般又梗又慢固不待言。最慘是自己一個人起床，根本無處用手借力 ~ GUT起身會突然痛到標...汗...唔只，禁不住哎吔慘叫一聲，又撻番落去...。左、右兩便碌，甚至碌去床尾，想搵個位就住起身...都似乎甚難；唔掂就抖陣，又嚟過，如是者忍痛搞成幾分鐘，搞到真係有尐微汗。
頂唔順，罕有的食了一日止痛藥...。費事騰去搵白袍老友，自己間中敷下熱PAD希望舒緩痛楚一二。期間有時唔覺意行動稍為粗心大意又牽扯一兩嘢，錐心之痛，真大鑊...。
復元過程緩慢，差不多有兩個星期行動不便。近一兩天覺得痛是不大痛了，但始終要就住就住活動，恐防再牽動到傷患之處。
自大人開始放暑假以來，幾個月未去過做運動，筋骨沒有鍛練一段時間，或許是原因之一。
昨天好天氣，食完印度咖喱角下午茶， 大人開始煮飯，我過公園輕抒腳頭 ~ 以龜速慢行，順便影幾張相。
 |
| 隔離有母女餵包，引來群雁。 |
 |
| 海鷗都不執輸，落嚟分一啖。 |
 |
| "我地又嚟..." |
 |
| 搶食世界 ~ 人禽皆然 |
 |
| 姐姐休笑我，龜行蝸步... |
 |
| 有人擔埋櫈嚟 |
 |
 |
| 弱苗要受鐵網扶持保護 那我條蠻腰早前豈非都可能要整個腰封為佳? 我至怕煩... |
一出家門，美景處處 ^0^
回覆刪除多年前曾有類似經驗，又係左後腰臀之間，唔知幾時、如何整親，由得佢，過了一排叫做冇事，但久不久嗰個位會有尐寃痛，時多時少，到現在該處仍有“感覺”，如不良坐姿保持太耐，又黎過，現在常備止痛膏布，邊度痛貼邊度，暫時算新戶，幾有效的 ^^"
一模一樣...連位置都咁準, 哈...
回覆刪除現在睇電腦坐得耐, 要起身鬆下, 起身時後腰會有尐 "好梗、痠攰" 的感覺, 一起身略似蝦米, 要行陣郁陣才挺得番直腰板...
暫時似乎漸見好尐, 希望 "多年後" 會了無痕跡...不過預咗多數就算呢度冇事, 又有第度唔妥架喇, 哈哈...
早十年八年前腳踭痛，諗係所謂“筋膜炎”啩，坐完一起身踩落地，痛到彈起，要企一陣，“趷”幾步冇咁痛才正式起步，阿婆咁款.....:-( 唔著得平底鞋，只能日日踩波鞋，都叠埋心水做耆英架嘞，慶幸呢兩三年逐漸冇事，可以著番尐時裝鞋，唔做阿婆住....^0^~
回覆刪除唔使理(?)...呢兩三年逐漸冇事(嗯, 重可以跑半馬添...哈哈!), 咪好囉。
回覆刪除到咁上下唔係呢樣就嗰樣, 早些年應該係肩周炎, 有時幾痛, 白袍老友都係開止痛藥(應該都有消炎作用), 聽語氣似乎都冇乜得點搞(斷尾), 於是冇鬼理佢, 如今好似鬆番尐, 但不時仍會痛痛地; 現在到大人...佢最近一個星期針灸兩次, 佢話好咗尐(?)...。嘿, 我見到枝長針拮落去就心都寒埋, 我自己就慳番呢筆。 :-)
腳痛時，正睇緊中醫，醫師叫我用藥渣煲水加少少醋浸腳，之後dup下腳踭，平時可以食下醋，浸藥dup腳做過幾次就算，食嘢時記得就落尐醋調味囉，後來稍有好轉，跟住就由得佢。印象中學跑步時仲有尐尐痛，跑咗步後就好咗九成九嘞....^0^
刪除這幾個月冇過去運動室行, 時間係自由咗(因為有尐時間特別多人, 去就要避), 鍾意幾時瞓、幾時瞓醒睇吓美股都得... :P
刪除不過始終都要郁動鍛練下, 咪真係尐關節會生锈, 尐多嘢就容易 "受傷"。
小心呀老兄,大陣好緊要架,早幾年每年硬有段時間腰痛,伸唔直,要彎著來行,近喱幾年又無喎,應該同運動有關,郁多啲啦.
回覆刪除有心...根本都唔知點整親... :P
刪除已經慢慢好尐, "病去如抽絲"..., 急都急唔嚟, 現在就住郁囉。
自己平時衰懶做運動, 抵C喇...
你冇講錯，戴腰封有用。我多年前也試過，一早起床不能動彈，下半身唔郁得，又係好辛苦攀攀爬爬至起到身。醫生判症話係有一節骨退化，於是做左一輪物理治療，有好轉。但你小心呀，呢輪腰骨有開事，有時小小一個動作又會觸動患處。我嗰幾年久不久便翻發。後來我去上瑜伽班，touch wood呢廿年都冇事。你可能少運動，肌肉柔軟度唔夠，好易扭傷。就算唔得閒做gym，平時多伸下懶腰都有幫助的。小心保重呀 !你屋企咁多花膠，得閒煲多啲花膠食啦 !
回覆刪除我見過人用腰封、頸箍..., 我諗都係衰呢類嘢先會用, 所以想當然。
回覆刪除自己久不久就有一劑, 唔覺意伸手盡尐攞嘢咁就扯到條筋, 當時唔覺乜滯, 一兩日後嚟料, 要幾日才開始鬆番尐。今次就真係唔知幾時、點樣整到...
以前行完機會做多十五分鐘左右全身屈伸動作, 好像就比較少咁整親，不過近月唔做開就懶，諗住呢劑休息夠, 復元後就重出江湖架罅(?) :P
愈嚟愈少煮飯, 所以乜鬼都懶整...
腰骨有事嗰輪我也有戴腰封上班，瞓覺時才解封，個腰封有幾條鐵線支撐住，可以舒緩腰背承受的壓力，戴左好舒服，否則坐左一輪起身時會特別感到痛楚。人是有惰性的，只要你肯做番一輪運動，當變成習慣後便會當例行公事，唔做唔舒服的了。出外用餐始終不及住家飯健康，起碼自己可控制鹽油糖的份量，為身體，多啲在家煮食啦。
刪除今次暫時應該慢慢已好得七八, 我諗等多十日八日, 完全唔使就住郁時, 就會去行番架嘞...卦?!
刪除大人返工就費事佢煮咁多餐; 通常星期六、日放假多數會煮一餐, 順便留餸佢帶飯, 一星期大槪煮兩至三餐。有時喺屋企淥粉麵+菜兼開下, 好簡單的。出街多數去飯堂..., 一人一個餐多數食唔晒。
健身室的步行機好似幾勁下，因住呀，哈哈。你呢輪去公園散步會安全啲喎，得閒在家做下柔軟體操或伸展下筋骨都會有幫助的。希望你快啲好番晒啦 ! 我地依家係老人家來的了，小心為上。行路出入寧願放慢些，跌親可以好大件事。
刪除步行機可以自己調校速度, 校到好慢都得, 有些比較龍鍾的老人家一樣可以慢慢咁行 ~ 至多咪同佢地一樣囉, 哈哈...係驚人多啫。天氣好, 冇咁晒就會過公園行, 行下睇下, 冇咁悶; 不過現已秋涼, 一有風就會凍尐。
刪除我現在都唔慌快得去邊喇... :-)
我讀書時都試過痛到要碌落床...應該係坐得太多太耐...趕住做功課...由朝坐到晚....:(....
回覆刪除到咗依家呢...腰背痛就已經同我結伴良久...更加唔捨得分開....:P
那麼說來, 好在我讀書的日子少, 又不大用功, 所以勉強可以捱到近年才出問題... :P:P
刪除嗯, 你那個是青梅竹馬的伴嚟喎... 到如今, 重纏綿難捨添..., 既然係咁, 就算氣壓低, 得閒都多尐同 "佢" 一齊出去行下散吓步, 行行吓, 睇吓可唔可以喺邊度賣甩 "佢" 囉, 哈...