假日雜食雜記

大人又再有連續四天假期，鬆毛鬆翼。

上週五又(!)是學校的PA DAY假期，明天星期一則是加記的感恩節。



星期五大人自己約了同事逛街竟日，送了她赴約之後，回來我獨守空房 ~ 無所事事，樂得清靜。在電腦前磨磨蹭蹭，睇吓美股，巡吓網誌；偶爾揭幾頁閒書，攰就掩卷瞌陣，口痕就摷尐嘢食 ~ 無無聊聊就此 "虛度" 大半日，自忖也算是個適志(!)寫意的小懶仙了。  :P

約好晚上等弟弟和侄兒兩仔爺睇完楓葉、去完賭場出嚟就一齊食宵夜肥牛自助火鍋... 。

晚上要去食宵夜自助火鍋
下午茶小食 ~ 留肚
之後要跴到近十點

一盞毛尖
睇吓美股(收市再升110點 :-) )，巡吓網誌

今晚揀食宵夜肥牛自助火鍋的原因，是因為兩仔爺要比較遲才返到出嚟，而我半夜亦要跑馬仔，通宵達旦，大把時間消化。兩下湊合，正好；宵夜時間的價錢亦比晚餐平尐...。

加$2食靚尐的安格斯肥牛
星期五晚又要加$2
都幾乎等如晚餐的價錢了

比晚餐略略少尐嘢食
都很足夠喇，食得呢樣食唔到嗰樣
而且主要食牛肉，三兜友淨係牛肉都食咗七八碟
臨尾整兜仔所謂 "龜苓膏" ~
其實我諗係涼粉草，連土伏苓都唔知有冇
不過，至少冇發 "毛"

-------------------------------

這兩日趁得閒，雖然人懶，都要開始搞吓舊BLOG嘅備份。

這些年用來用去都不外係那兩三樣簡單軟件，而且還是停留在基本初階的程度，其他的就一竅不通了。於是好多嘢要左問右問  :P...( 向那兩三位被我煩過的、還會繼續煩下去的......衷心致謝；Salute.! . :-) )

連怎樣去解壓縮檔案以前都未做過，唉...一邊問，一邊做...，自覺廢廢哋...

今朝同大人飲完茶；午餐小食...
自己不常買包食
但久不久大人的同事會有尐免費波蘿包、排包...醒給大人
食得唔好嘥 ~ 通常大人搞掂尐排包，我就搞掂尐波蘿包

早幾日見煙火雞腿減價，買了一隻起肉

明天感恩節 ~ 今日食幾片火雞腿肉，算應吓節
加杯鮮榨石榴汁 ~ 石榴個頭不大，但勁甜，要溝尐水

大人逛街 ~ 吃的收穫

明天大人應該會煮番餐咯...