數廢逐樣舉

駕駛執照

回港前從銀包拎起晒加拿大的證件, 換了香港的。返來之後, 調轉頭做。可是搵來搵去, 搵唔到張駕駛執照。老人痴呆, 全無印象擺咗去邊。無辦法, 第一件事, 翌日一早, 由大人車我去申領過一張。十蚊雞, 即時印發一紙臨時執照, 兩星期後寄正式的咭來。


----------------------------

整車換油

早前座駕每當踏剎車至差不多停定時, 會聽到一些 "戞戞" 聲。不過剎停功能似乎暫時無乜問題, 於是便等回來才拎去換油及一併檢查。

昨天約了車房師傅。師傅說是前輪剎掣的泵(?)壞了, 因為平常行得里程少, 泵就易壞(?), 要換。連埋換油盛惠$360。

屋漏更兼逢夜雨...返香港使筆甘(口既), 回來又多一劑...。

-----------------------------

水箱

有個廁所的水箱不停漏水落坐廁, 流水淙淙。除了清潔, 我唔係幾識搞家居的水、電瑣細。攞番架車之後, 就去問吓情況。

...約師傅上門檢查, 唔整都要收費$30。要點整及所費若干到時由師傅話, 大概$50-$200之間。

水箱漏水不外一兩個原因, 收費幅度咁大, 你話要$200, 我唔整, 都要畀$30...。

大人提議去買個零件番嚟自己換, 我唔識, 反正不貴, 一於依她。哈, 去到又唔肯定邊款啱用, 唯有返屋企拆了水箱內的拎去做樣板, 好在兩處距離不遠。終於買了個$4.99的零件, 大人幾吓手勢已經搞掂, 起碼慳番一百幾十。稍後可能索性換埋其餘兩個。


-----------------------------

打雀

離加月餘, 屋企的麻雀久無手澤, 荒廢了一些時日。在港期間此地雀友難以成局, 唯有引頸...

耐心等候我哋賦歸...有位詩人還不時作詩寄意, 電郵給我, 詩中盼歸情切哩...。 有詩為證。

          "雀臺沉寂已多時, 佈雨行雲久未施, 四路龍城重聚首, 升壇點將莫延遲。"

約了今天先飲茶一敘, 然後嚟我屋企打番場, 以慰別後相思之苦。

大人作先鋒, 我就去瞌陣(哈, HKT的半夜嘛...

)。一 "瞌" 居然接近四小時, 總算可以叉番啲電。望吓戰情, 見大人形勢大好, 當然由她繼續廝殺, 乘勝追擊。

終於大人一個贏晒, 進賬百三蚊。據武功秘笈所載, 內息谷住無處宣洩, 不住翻騰, 辛苦而且危險; 今次略為放血, 佢哋會舒服啲嘞卦?...


後記：
HKT 27/8/11

詩人又來電郵。文曰：

昨日一戰，三雄敗北，女將稱王。有詩紀之：

       "由來巾幗勝鬚眉, 鎩羽龍城此獻詩, 烽火漫天馳一騎, 沙場濺血折三師。"

大人想必躊躇滿志, 鬆毛鬆翼咯...