11回港之旅之歸程花絮

我們搭的是香港時間星期一下午三時十分的加航航班。

因為居處無電梯, 加上天氣炎熱的關係, 於是一早計劃撤退的程序：
  - 隔夜叫定架的士, 十一時半到樓下;
  - 朝早預先搬定幾個大喼落樓, 請管理員睇住, 返上去沖乾淨成身臭汗才出發;
因為大人最後執喼執得仔細(即係...慢囉), 時間緊逼, 沖完涼才搬最後一個大喼...。那幾個喼磅住嚟執, 每個都接近50磅。逐個搬, 行五層X每層2叠樓梯, 都幾係嘢, 當時索氣不祇, 在機上發覺右手手腕外側頗痛, 用唔到力, 應該是扭傷了...。至於手臂、大腿和條腰到現在仍有些攰, 正式是週身痠痛...。  "吾老矣, 無能為也矣" , 嘿, 切身的感受。

其實最後兩天間屋淨番我哋兩個---外母去了日本, 姨仔去了台灣, 一齊出發, 我們走後才回來。小舅夫婦來送機, 用佢架名牌歐洲跑車幫手載了一個喼, 其餘人、喼就由的士一車載晒。沿途暢通,  四十分鐘左右已到機場。

大家先後腳抵達, 甫排隊CHECK IN之際, 即時有地勤小姐埋嚟游說我們：你哋趕唔趕時間返加拿大? (), 呢班機好爆好爆(鬼叫你哋航空公司旺季都接受咁多超額訂位咩?), 若果你哋延遲一班機走(一日一班咋喎...), 公司畀每人C$600 ......COUPON, 一年內用嚟買機票, 或授權他人使用都得(嘿, 現金另外加機場酒店一晚就話考慮吓啫...), 咁麻煩, 梗係咪搞喇。埋到COUNTER, 負責CHECK IN的櫃台小姐還未放棄, 但都無功收聲。

CHECK IN完匆匆入閘, 因為EX波友同事話佢收工過嚟送機, 約了在大家樂等...。

大人肚餓急不及待, 先買了個雙拼飯食住先, 雞鵝的餸料唔靚, 又貴, 成$54; 搶錢。
我就等埋朋友先...

原來機場大家樂有雙價制, 機場工作人員有另外一個餐牌價錢, 朋友話佢買抵啲...
我要了個餐：兩兜餸---鹹蛋肉餅＋粉絲肉碎蒸蛋; 飯+奶茶。祇不過$34, 抵得多!

邊食邊傾, 朋友更報料說今日國企二、三線股大大鑊, 有些跌到趴度, 我的愛股亦C火。我說都冇眼睇, 現在沽無可沽, 反而一路跌、逐級買少少, 買到乾塘,  等運到, 一如金融海嘯時一樣, 說到底, 目前比那時應該好啲。

開完餐帶大人去買了兩本八卦雜誌, 臨走重鬼咁客氣, 送了盒信陽毛尖給我歎。

夠鐘上機。

起飛後所見真的唔見有空位, 且年青人特別多, 相信都是趕回去開學的, 所以咁爆。

機上的戲和個多月前返港時的一模一樣, 冇齣啱睇。唯有睇吓小說雜誌, 又開部電腦搞吓, 打發時間; 間爾瞌陣, 到時到候又食吓嘢; 可能之前瞓得較好, 今回似乎沒有那麼辛苦。

看書我是拈輕怕重(與做人同出一轍), 頗怕鴻篇巨帙的沉重甚至沉悶, 輕便型的正宜在飛機上打發時間。在此再多謝同事贈書。
書中言之有物, 自己覺得很有道理.....只恐怕未必會人人認同。

好似食藥咁, 每隔五、六小時食一次...

第一餐

大人見在金宅那晚飲咖啡酒飲得高興, 整枝仔試吓...

空中前少爺推另一架車行過見到, 唔知係咪攞一送一, 或是以為我哋係酒鬼, 不由分說, 自動整多一枝嚟...

坐咗幾個鐘, 還有一半多里程, 陰功...

第二餐

刻意營造易睡的環境, 奈何我冥頑不靈....

終於...

落機前食埋呢餐

今趟過關遇到鶴神, 要入房檢查行李, 大人有的驚驚地...
問有冇帶乜..帶乜, 冇, 冇...。
"剛才問的你哋話冇, 若果摷到, 可被罰款C$800! "...C頂喇...

終於畀佢摷到一包 "杜仲", 問係乜? 佢唔識, 我哋又唔識點解釋, 祇說是中藥材。佢拎去問人, 回來說是植物/樹之類的物體, 加拿大是不准入口的。不過佢相信我哋唔知係乜, 所以唔罰錢, 祇充公了事。我哋還帶了不少海味, 好在佢無GEEGUT話帶得多, 就咁放行....

有啲係人送, 有啲係送畀人...