幾乎跪低。今週一勞

今週天氣仍然極度寒冷，日間都差不多 -20度上下。

老爺車昨日幾乎跪低 ~
食完自助餐回家在馬路中間的行車線上打算等冇車經過就轉入屋苑時，
部車忽然發冷打顫，瀕臨C火...；
大佬，頂住呀!   ^_^"

好在馬路當時已經冇車，立即嗱嗱聲畀大尐油進入屋苑，駛落停車場。
從後面別人的車位直隊上嚟自己車位泊好(冇車就唔使倒車)鬆晒油之時，
部車震兩震，果然C火了!!

再撻，甫著又C火；反覆兩三次都如是。

冇辦法，返上去 致電修車師傅問下點搞。

".............................................."
"著唔到車呀? 咁要搵拖車拖嚟公司等我幫你睇下 (畀了拖車公司電話)..."

要拖車? 又要安排大人翌日一早返工添，唉...
真大鑊，今回認真頭痕。

首先BOOK定廚神一早落嚟車大人返工先。
打電話搵拖車前，唔心息，再落去搞下...
都係咁，一著車，怠速只去到大約500轉，震兩嘢又C火...
反正都係，試下一著車即畀油，畀尐...畀大尐...畀到好大...谷到上3/4000轉...
跴了一陣空油，搞到附近充滿廢氣氣味... :P
鬆晒油 ~ 轉數隨即回落 ~ 到1100轉(正常怠速係8/900轉)就定住，
哈，似乎掂喎... 

熄車再嚟...冇再震；依樣葫蘆，再來一次!

上屋企再致電師傅報告情況
佢話咁可能係天氣太凍，油管內有尐水氣結了冰塞咗...
(食自助餐時，架車泊街成個幾兩個鐘)
剛才跴 "行" 一輪油通番都未定

昨晚和今早都落過去 "試車"，覺得OK，然後一早叫廚神唔使嚟咯；
稍後還約了師傅下星期一去換油，順便睇睇使唔使搞尐乜。
哈，算十分好彩鳥!!

-------------------------------------------------

昨晚嘆完餐唔使做的，大人今晚煮番餐，勞一勞。

刴豬肉+蝦釀豆卜，剩番用嚟煎餅。