抽絲五日

上星期五做完運動同家人食飯，翌日瞓醒開始覺得週身唔聚財 ~ 少少頭刺，肌肉同副老骨頭都覺痛(阿Q：運動過 "勞" 啫?)，周身 "乸" 住，腸胃又谷谷地(星期五嗰餐食滯了?)...。嘿，Q還Q，經驗話畀自己知，多數又領咗嘢喇！

經驗豐富，打算捱一兩日看看如何。似乎愈嚟愈弊 ~ 精神不振，又攰又眼澀，典型的感冒徵狀。星期日臨瞓(唔舒服就瞓得唔好)開始啪感冒丸，本來一日四次，不過通常唔食足， 一日食兩次至三次等稍為冇咁辛苦就算。到今日星期三，清晨開OT精神還可以，唔係太烏，第一場就中了條位置Q，似乎感覺已經好尐。尤其近兩日漸漸可以恢復正常的 "減倉" 功能，腸胃舒服鬆番不少...。接完放工又送大人去做針灸，自己就照舊行超市、兜商場，買了兩盒壽司返嚟做晚餐。食完保險尐啪多粒藥，算是完成了這個 "療程" 。現在開緊工，棈神幾好。 :-)

時常揩嘢，自己大槪知道個譜。約莫五至六日，病毒通常就會 "走人" ，離我而去  ~ 當然期間要冇乜感染其他諸如喉嚨發炎及咳嗽之類...。

有謂 "病去似抽絲"，急也急不來。要慢慢抽，慢慢咁抽...，廢時失事又唔舒服，自然不爽。所以啊，走咗就去第二處玩耐尐，唔好咁快又番嚟罅...。