早兩天趁暖尐去做番日運動
之後又攰又周身痠痛，唔係做到好 "行" 咋喎...咁渣?!
連腸胃都谷住...
唔駛問阿貴 ~ 又衰咗
拍了兩次丸
現在開工比較今朝舒服了一些
今晚新聞報道本地衞生部門稱近來流感案宗到達高峰
而H1N1流感病毒的殺傷力比較嚴重
促人去打流感針(強調今年的流感針已包含H1N1的病毒類別)
自己知自己事，年年有得打就速速去打架罅 :P
大人晚上煲粥食
之後又攰又周身痠痛，唔係做到好 "行" 咋喎...咁渣?!
連腸胃都谷住...
唔駛問阿貴 ~ 又衰咗
拍了兩次丸
現在開工比較今朝舒服了一些
今晚新聞報道本地衞生部門稱近來流感案宗到達高峰
而H1N1流感病毒的殺傷力比較嚴重
促人去打流感針(強調今年的流感針已包含H1N1的病毒類別)
自己知自己事，年年有得打就速速去打架罅 :P
大人晚上煲粥食
外出嚴寒，入屋溫暖，溫差咁大，好容易領嘢，做運動唔使出街，勤尐做啦﹗
回覆刪除知道出面凍到黐線反而會不敢大意, 著到加零一架罅...:-)
刪除做運動原則上都要落街行過去隔離柏文, 不過就可以落底下室內停車場轉轉折折兜過去, 就唔使行露天的地方。
其實有時感冒都未必完全關天氣事, 而係可能大人的高危職業帶毒番嚟機會多尐, 又或者過去做運動時人雜, 難免唔好彩會沾惹了尐病毒...。已經格外小心, 用機時用紙 "隔" 住扶手之類, 不過抵抗力低下, 哈, 年中至少總有幾次係在劫難逃咁囉...
呢個時期周圍都係病人好易領嘢....小心d.......好似有蝦腸喎....:)
回覆刪除遞日最好研發出可以睇得見尐病毒的唔貴嘅眼鏡, 又研發出一個能夠發出咇咇聲的感冒病人感應器... :-)
刪除蝦...都畀MISS睇到, MISS對神眼可能唔使用眼鏡都見到尐病毒 ;-)
腸粉係朝早同大人飲茶時已經打算煲粥, 於是執定夜晚食。
唔止蝦腸仲有隻糭添，哈哈 ! 煲魚粥好似好多料喎，睇見都流口水。 你都幾容易感冒，聽你講年中會"揩"幾次，算多左啲喎，小心保重身體，飲食要清淡些 。你嗰邊打流感針是否免費的? 打左是否真係冇咁易感冒?
回覆刪除驚食粥頂唔到第二朝嘛。 :-)
刪除大人至叻成條青班起肉, "淥" 粥佢比較講究 ~ 先煲好煲粥, 那些頭骨腩就另外搵個煲仔用少少水滾熟上碟, 以免尐骨混在粥內, 當然那些淥魚水會倒番入煲粥度唔嘥; 生的魚片就食時才放入粥內滾番即食。今次條魚成兩磅架。
多倫多難以搵到間好似以前孖沙街的生記嗰類粥檔/舖 ~ 而且就算以前生記我都覺得粥底有落 "師傅" , 食完會有尐口乾。不過佢哋尐粥碼就很正, 那些魚咀、魚鰾等等食得繑口, 呢邊就梗係冇得食。 :-)
講完食, 再講病 ;-)
刪除打流感針是全民免費的。不過有優先次序, 第一批會讓那些慢性及長期病患者及耆老打先, 然後才輪到其他人。
打了流感針並不能完全與感冒絕緣, 一樣會領嘢。不過普通感冒的殺傷力相對輕微, 沒有併發其他嘢, 四五日就自動會好(?)。
流感相對比普通感冒厲害, 領嘢之後, 一些抵抗力差的病患者及耆老會容易併發其他的嚴重病症而致命, 打了流感針就可以減低這方面的風險。
流感針一般只得三個月左右 "保護期"(?), 而且病毒成日不停變種(今年打的疫苗, 會係舊年的熱門肆虐病毒)。一個天冷的流感高峰有時唔只三個月, 不過據白袍老友說, 衞生部門條數係：首先等高危人士打先, 首期頭三幾個月佢哋安全尐, 稍後其他的人陸續打, 又到嗰班人冇咁易領嘢, 首期打的高危嗰班, 就算稍為過了保護期, 其他人仍會冇咁易領嘢, 少尐機會傳染畀番高危人士。
所以呢邊的衞生部門成日好肉緊咁叫多尐人去打流感針。
不過另外有一班人係反對打甚麼甚麼預防疫苗的...
大人果然好好心機煲粥，次次都用條新鮮石班起肉煲，好正。煲魚粥我多數用鯇魚腩咋，下次學下你地用呢個方法煲粥都好。
回覆刪除香港好多長者中心會定期為長者打流感針，以前也有陪過我媽媽去打，不過要俾錢的。係呀!流感唔講得笑可以致命的。記得年前患過流感，周身骨痛，疲倦乏力，成身軟晒的，又發消，辛苦極了。初起時，以為是感冒，走去睇中醫，食左兩劑中藥完全冇料到，又退唔到消。即刻轉睇西醫，完來染左病毒，食兩次藥已成身鬆晒，以後有事我都係西醫行先。
所謂青班, 其實係屬鱸魚科(BASS)的魚, 釣魚友稱之為大口鱸的, 勝在係游水的, 肉質OK。 我哋呢邊不比香港咁多靚魚食架, 選擇非常有限。
刪除香港的鯇魚新鮮好食 ~ 尤其從前元朗及流浮山一帶仍有不少魚塘時, 養的鯇魚應該比現在的更加好食 ~ 生記賣的都係鯇魚咋。以前返香港做散工時, 頭尾成四、五個月, 一兜友喺街搵食, 常會去食個梅菜蒸鯇魚客飯...;-) , 鯇魚用來煲粥做餸都很好。
但係呢邊的所謂鯇魚、草魚(大魚)現在都係冰鮮貨色(以前有游水的, 但政府後來唔畀, 驚尐識游水的 "游" 咗落湖, 開枝散葉, 大量繁殖, 影響生態, 於是禁止超市賣那些的大條活魚)。嘿嘿, 冰鮮魚肉質欠佳不說, 而且還常有我最怕的泥味, 同香港的差得遠咯。
自己年中不時覺得領嘢, 其實都唔知係乜感的, 多數周身攰、肌肉+骨痛、頭刺刺, 腸胃谷住, 不過就似乎較少發燒(?)。若無喉嚨發炎(有就要去搵白袍老友攞抗生素食), 就自己啪兩日所謂的感冒丸(應該即是必理痛?), 屋企又有咳水, 有需要就食, 等個人舒服些少, 瞓得食得下, 休息四五日通常就好。
哈, 我諗我成日揩揩埋埋咁多, "訓練有素", 身體入邊的H?N?抗體應該又多又亂籠, 就算尐病毒成日變, 希望或者都頂得下卦?! :-)