因勢

本來大人諗住趁假期尾聲勞一勞
叫侄女一家星期三上來食飯同靚妹玩下
(多數會順便同我搞埋部新電腦)

可是自己知道揩嘢嚴重之後
為免散播病毒逼不得已臨時提議改期
稍後擇日再約

一早諗住煲個雞湯(?)嘅
瑤柱等一些湯料亦已浸定
昨日因應 "情勢" 改煲了個比較清潤的潤下自己先
雪耳瑤柱淮山南杏瘦肉湯
(上次買了包 "益" 的北杏丟了仍未補倉)


有湯水潤一潤希望男女雙聲兩部胡混大合咳早日落幕

饞口寡了幾日
湯雖清淡...都覺得幾好味
餐頭胃口呆滯之下當個小食...至少食得唔算勉強

短期似有繼續尋底之勢

----------------------------------

後記

這幾天抱著可免則免、親人勿近的心態
(和大人則幾乎是同病相憐...
且亦採取了接近禽流感肆虐時期那個級別的衞生防護和隔離措施)

噫...今日2號並非公眾假期...大人又得閒

新年伊始

倒可以拍拖去探望一下...侄女的母親

在飯堂吃過早餐
然後巡埋鬼佬超市捧了一大袋出來

揸車出發 ~ 對我們來說算係 "遠路" 了

昨晚開工時下了一場小雪
今朝 "風和日尚麗(?)"
(不過虧虧地仍覺得凍)

灰曚曚了幾日
見到藍天略覺爽神

輪流做了一轉副駕
我揸去...
讓大人揸返 ~ 順便操車一課

唔瞌眼瞓應該OK喇  :-D

----------------------------------

回來電力幾乎耗盡
瞓個晏覺

然後出去食番餐勁嘅 ~ 相對揩嘢之後所吃的  ^-^

皓月照 "虧" 人

其實係食平時叫開那些餸而已 ~ 不過今晚特別交帶少油
部長姐姐問..."今晚唔要炸蟹鉗呀?" (以前多數係叫呢三樣嘢的... ) :-D

 甚少一碗白飯兩份食
並且刻意挑了魚脊一條冇油浸住的肉...

先是例湯
後變浴湯
桌上的牛魔王呀、小青呀都在這裏一起共浴了 ~
前者的油頭粉面以及後者的 "鉛華" ...都給沖刷得七七八八
才送入饞人之口

今日飯少...溝後淺嘗兩羹豆腐花

呢餐簡單嘢...不過覺得味覺逐漸回來了
食完呢餐似乎精力略增