眼鏡、機套

新眼鏡戴了近半月, 漸漸習慣..., 不過想起個價錢, 仍痛。

今天又收到相機的機套...幾靚, 而且唔使錢的

不通、歎茶

早幾天, 半夜開工時隱約聞到有些少臭味, 尚不以為意。落樓下斟茶,  見廚房兩個鋅盆都裝得滿满黑黑的...; 知道是塞喉, 啲污水(好在唔係個塔)從下面倒灌上嚟, 大鑊!

正如網友話齋, 啲嘢壞開有條路, 接二連三咁發生。我哋平時用得已經非常小心, 鋅盤長備一網格隔去所有的渣滓...。於是連忙 "畢" 水, 待水位冇咁高又泵了一輪, 可是完全冇反應, 搞到成晚冇得瞓, 好在啲水冇從鋅盤流出來。

翌日立即問管理處要了承建商的電話打去叫人嚟整, 報價收費首小時C$150, 續後每半小時加收$35, 換零件另計。唉, 更貴都要畀喇。稍後從管理處知道, 原來隔鄰的單位亦一樣情況, 應該是我哋兩邊的喉管互通的緣故。過隔離睇吓傾吓, 說我已搵人明天嚟整, 不如一齊整埋, 若不介意, 到時就兩份分擔費用...。因為心裏估計若果整好, 應該兩邊都一齊通的了。隔離戶主的兒子說明天都會留在屋企等, 到時叫埋佢過嚟...

兩日冇得用鋅盤, 十分不便, 夜晚唯有出街食, 日間我自己喺屋企食吓雪櫃嘢, 食完都冇得洗, 用紙濕水稍抺放響度...。

經常要 "畢" 水, "畢" 了幾次, 啲水已經比較 "乾淨" , 水位亦已稍低...

...

出齊傢罉

食完的碗碟---洗不得

翌日下午有個鬼仔嚟搞, 帶了個姑名之為 "毒蛇鑽" 的傢罉嚟, 連接一條頂端有尖稜, 可伸縮及小幅擺動的粗金屬彈弓似的物體。放了一輪水, 開動小型機械將毒蛇鑽從喉管伸入...。可是去到盡, 搞一輪, 拉番出來, 唔見有污糟嘢黐住, 啲水亦未去得通。又落去佢架車度攞個更大型的---一個空心大車胎, 內捲藏了多圈更長的彈弓, 據說可以去到35'。又再搞一次, 最後終於搞掂。不見有甚麼殘渣塞喉, 據說可能是因為大喉的油脂...

安樂晒...

今次並非因為自己用得不當而塞喉, 可能唔使自己畀錢, 由管理處找數...。


--------------------------------------------------------------------

今天大人休息, 去飲茶

臨走的早餐

舊相機修理好, 快捷妥當, 而且...免費, 慳番幾十。所以說, 目前階段我喜歡用CASIO是有理由的。

這部舊機所託非人, 一向大多發揮不出應有的性能, 更遑論盡展所長。若機都有靈性, 早前之 "病" 可能是因此而鬱出來的。人與物俱有其性, 也講求一些緣份和際遇的。現在既有年富力強的新丁接力, 稍後就讓舊愛暫時隱居在座駕的雜物箱內, 舒服地嘆吓世界, 又可以陪伴我和大人出入, 增加安全感。如此一來, 想換部有影相功能的手提電話的需要就不那麼逼切了。

記憶咭跟相機回來, 早前和香港來客臨走那朝去食CREPES的相可以重見天日。



早上廚神帶路, 我揸車...

香港來客和大人在地圖前指指點點, 猛搵香港的位置來插針---以示由何處遠道而來幫趁

住家式的小店, 應是下舖上居(?)

兩夫婦夾手夾腳, 老了有些細藝, ...很好吖

四個人點了四款, 諗住每人一樣試啲...不過, 原來每份都好大份的...

餡料分別是---三文魚、芝士火腿煙肉、波菜吞拿魚、磨菇蟹柳

食完行陣, 看看萬錦MAIN STREET保留的舊建築物...

三人行...有老師...的親屬焉, 而且有兩個添...

黃昏隨影、雀局報捷

昨天大人預備淥烏冬食做晚餐。趁佢搞緊未得, 又拎部相機過去公園兜兩個圈, 亂咁影...

漸黃昏...

這邊廂太陽西下

那邊廂月亮高掛
幾圓喎, 回來一看日曆, 原來是農曆十三了...

是時候返歸食烏冬咯...



------------------------------------------------------


今天是公眾假期, 大人放假, 同事早已約了兩枱雀局。稍後台柱返港數月, 此場是臨別秋波, 可能有排冇得打了。

近來多間酒樓的雀局價錢都紛紛加價(乜都加...), 打開的那間由早前的每位三十元加至三十三元。因為今天公眾假期, 午市飲茶較旺, 要成三點才可以開枱, 唯有另覓地方。公眾假期好些酒樓不設雀局, 終於搵到一間, 老闆娘以前在舊店識得, 如今離巢自己經營, 賣了個人情...不個每位要三十五元, 食兩餐。

間舖祇做小菜, 午市沒點心吃。 總共十個人, 有兩位聚完就走, 粥粉麵飯一樣一啲。鱲魚粥一大窩---另蒸頭、骨; 肉絲兩面黃; 干炒牛河; 牛腩撈粗麵; 欖菜肉碎炒飯; 籠仔蒸雞飯, 芥蘭菜心各一。我都係比較喜歡飲茶食點心...

晚飯---大煲翅一窩(所謂大煲翅, 唔多覺有翅); 燒雞一隻; 美極時菜豆腐; 咕嚕肉; 羊腩煲; 蒸魚頭; 蒜子白菜苗; 鹹魚蒸肉餅...

神雀俠侶一齊告捷---大人贏14底, 我都贏了十底。