今天通常是廚神一週幾日落嚟我處游水/運動的其中一天, 約她做完一齊飲茶。
送完大人返工, 仍早; 又過公園行陣。精神稍佳, 步履比前幾天稍快。
可人拖犬...甚有瞄頭 
家居閘口附近正趁夏天美化園藝---重造花圃圍壆、舖泥、下花苗...
花顏近百...今夏十分妍
---------------------------
梳洗完畢, 先去搵位; 因住時間劃定點心等廚神芳駕...
潮式牛肉球(四大粒)、鮮蝦韮菜餃
特意叫多了些 "硬嘢", 食剩預備拎走。大人喜歡吃這裏的牛腸...
於是一碟堂食, 一碟拎走孝敬大人
---------------------------
不久又到午餐(啪丸)時間---飲完茶仍未肚餓, 但又要飽肚食藥, 唔三唔四, 於是焗個隔夜雞尾包...
通常雞尾包內的傷身饀料, 要刮去一些才吃, 有甜味就算...
家中只有我一個人愛食牛雜，出街去潮州粉麵店：唔該一碗牛雜湯麵。＄２２ｈｋ。 如果，叫一碟牛雜撈面，＄４０幾蚊。我寧可食湯麵了。
回覆刪除[版主回覆06/17/2011 09:30:00]這邊的牛雜一般只有肺、肚及膀三樣, 沒有其他納雜嘢(起碼有腸都好吖), 比香港的大為失色---茶樓賣的更加乏善足限, 聊勝於無。 我返香港, 經常去食牛雜。行街若見到小舖入面有大盆靚牛雜(起碼要有肥腸等)/牛腩滾住, 就會心思思入去整番碗食。 以前後生當打時, 在香港常幫襯一碗XX粉麵+細淨牛雜一碗+細啤一樽...所以啊, 痛風是其來有自的... 。現在是奶茶代替細啤, 可是牛雜仍無可替代的!
阿大...早晨呀... ....雞尾包走饀...你下次食甜餐包算啦...
回覆刪除[版主回覆06/17/2011 09:37:00]早晨呀MISS... 不是走晒...挑走一PAT PAT大的, 還有不少仍黐在包裏, 已經頗甜夠香。 齋的甜餐包我反而不喜歡吃, 餐包我還是吃鹹的...
祝天下父親...父親節快樂!!!
回覆刪除[版主回覆06/17/2011 14:09:00]父親節快樂!
都好刷得下噃
回覆刪除應該好番了
[版主回覆06/17/2011 19:45:00]食咗兩三日抗生素+腸胃藥... 感覺的確冇咁 "病" 了
不過，而家Ｄ牛雜，不及６０年代係戲院門口推車仔嗰ｄ咁香，咁好味。 以前，一聽到剪牛雜嘅較剪＂索索＂聲＆遠遠聞到牛雜香味。口水都流出嚟。
回覆刪除[版主回覆06/17/2011 23:51:00]是啊, 記得(0靚)仔時, 在荷李活道的大笪地內, 有檔由一佝僂婦人揸剪的車仔牛雜, 內裏包括有我至今叫不出名堂的一些納納雜雜部份, 好像乜都有, 正得很...! 每當外婆濕我些少零錢, 我就去進貢給 "牛雜婆"... 。嗜食牛雜, 或由此起... 嗣後已少遇及幫趁街邊專賣牛雜車仔...移民後幾次回港, 有到廟街那檔車仔食過幾次(有次還在街邊士多整多枝細啤企響度食 ), 可是一邊食, 一邊對衞生情況稍有顧忌, 可能心理影響, 又或時移世易, 覺著風味已不比從前...。現在都是入舖頭坐低歎住冷氣食較佳, 當然要搵到間就腳又好食的...
可人拖犬...甚有瞄頭 既有瞄頭，追住跑吖嘛，離咁遠影，乜瞄頭都見唔到喎
回覆刪除[版主回覆06/18/2011 00:43:00]哈, 咁夜... 之前迎面而來, 甚有瞄頭 。不過當然不敢孟浪, 即時兜口兜面影人相 ; 唯有過咗 "影后" ..., 點知手腳甚慢, 又疏於練習影 "動態", 揸機對得嚟, 伊人已愈跑愈遠 。諗住等佢番轉頭先再影多幅喇, 可是時機不再, 就此失去芳踪...
阿大...早晨呀... ...你嗰邊幾銀一個雞尾包呀?...
回覆刪除[版主回覆06/18/2011 12:33:00]早晨! 一般應該$1.2+稅; 不過買夠6個就免稅的。 有些麵包店下畫五點或稍後就開始清貨減價, 六折有之, 五折有之...。 我不常吃麵包(早餐也不... ), 係諗住有時開工到半夜, 肚餓想食少少嘢, 就貪方便食一個半個頂肚。所以偶然才買一次, 而且會在減價時段才買, 買夠六個免稅, 放在雪櫃同大人慢慢食。食時就先叮後焗, 都仍新鮮香脆。
Hello...Good Afternoon!!!
回覆刪除Wish you have a happy weenkend and happy father's day!!!
[版主回覆06/18/2011 12:41:00]大家咁話!!
唔減價就比香港貴咯...不過我記得我N年前係大學買要兩蚊呀...真係物以稀為貴....
回覆刪除[版主回覆06/18/2011 20:56:00]嘩, 年前都兩蚊個雞尾包? 搶錢$$$ ; 貴是的確很貴, 不過, 或者可醫港生的思鄉病哩... 呢度幾乎所有嘢都比香港貴...嗯, 除了一樣---地產 所以亞公啲加幣拎返香港使, 就覺得樣樣都抵 如今世道艱難, 通脹肆虐, 自己消費要精打細算, 尤其已經淪落到不事生產、游手好閒, 在消費的時候, 都希望能夠得到最大的經濟效益... 可有可無的東西, 唔買; 名牌卻物非所值的, 唔買; 耐用品而不耐用的, 雖平, 都唔買, 寧願買貴啲...
無辦法唔貴...d"山卡啦"地方只得downtown有一間港式麵包蛋糕...大學都係同佢攞...咁我地又真係耐不耐都會買嚟食下...有d人買個菠蘿包仲整舊牛油攞去叮變菠蘿油.....
回覆刪除[版主回覆06/19/2011 10:35:00]咁我地又真係耐不耐都會買嚟食下...有d人買個菠蘿包仲整舊牛油攞去叮變菠蘿油..... 人情同於懷土兮(懷的包括故鄉的...雞尾包和菠蘿油 ...等等...)
牛雜 when cook right is very tasty!!
回覆刪除[版主回覆06/23/2011 21:59:00]偶然出街食一次...內臓嘌呤高, 不利痛風症, 食少少而已。