三條龍

車龍

往接大人放工, 在車內聽收音機叫人快啲今日入油, 明天每公升會狂加4.5仙!!! (今日$1.35 / 公升)

瞄瞄油錶, 還有半缸油多啲...不過既然事先張揚加價, 重加得咁重手, 諗住經過油站都順便入滿佢...

接到大人, 沿途的油站都已見車龍, 有些還在馬路邊排著隊, 未曾入到油站。看形勢至少要排四、五十分鐘以上...。都係咪搞, 入唔夠半缸, 排成個鐘, 通常如此情況又會比較混亂, 終於過門不 "入" 。到食完自助餐回家, 車龍仍未散...




烏龍(烏, 所以命色也; 與矇無關)

大人收工, 要去買些咖喱角明天返學校食。幫趁慣一間印度食品專門店, 裏邊好多叫不出名堂的食物, 單是甜品都睇到眼花撩亂。幫趁的九成以上是印度人。(據說印度人好像都分幾忽, 譬如東部、西部...等, 佢哋自己友當然識分邊忽打邊忽, 忽忽啲人會有啲佢哋不同的生活習慣, 包括飲食。此外, 印度果忽附近還有斯里蘭加, 巴基斯坦...等等, 我覺得 "差" 唔多又好, "差" 多少都好, 根本唔識分, 總之是膚色較深就是了 ...)

平常不會咁多人的,  但今日好似約埋一齊趁墟咁, 條龍有成廿人, 烏媽媽的, 儼然一條...烏龍。我和大人排埋去, 似乎亂了套, 有點兒唔係幾夾的感覺。





病龍

買完咖喱角, 又去見白袍老友。月初和大人一齊驗身, 佢今日才返去聽報告, 我就去聽埋上次自己的手尾。去到見人頭湧湧, 幾乎冇位坐。通常放完假尤其長假才會咁多人, 今日星期二喎...。等了大半個鐘輪到我哋, 今次我哋都喺入面傾咗好耐, 應該破了紀錄。耐的原因, 是白袍老友最近開始將病歷及藥物等資料輸入電腦, 諗住一勞多逸。佢一邊講吓問吓, 一邊打嘢, 見佢都唔係咁熟手, 搞一個都花了唔少時間, 難怪...出面咁多人喇...。

問佢點解唔搵個秘書做, 佢話秘書係有, 但呢啲嘢要自己落手落腳做才放心喎。早前佢趁春假放了兩個星期, 原來都係搞呢樣嘢。如此看來, 白袍老友似乎尚未有退休之意, 咁我哋都比較安心。