今天接了大人放工, 晚上未決定煮唔煮, 又唔知食乜好(昨晚已吃了日式自助餐!), 順道即管去巡巡超市。
去到魚檔見有一缸游水大花鯽, 價錢$9.99/磅, 大人眼睛立即發光。游水花鯽甚少有(有時會有上水的), 有亦未必大條, 從前應該是 "釣口魚"。印象夠斤兩的游水花鯽在超市從未低過雙位數字一磅, 愈大條愈貴, 一般$13/14一磅, 似乎還見過$16/磅的。大人就算見到, 都會嫌貴, 寧願唔食。
今次見大條又略平, 當然有殺錯, 冇放過!
大人語帶興奮請魚檔哥仔在整缸那十多條花鯽中揀條最...大的, 哥哥仔聽見也笑了。哥哥仔好心機, 魚網兜來兜去, 終於揀了條...1.2磅的。
劏緊之際, 旁邊有人企埋嚟, 不知是自言自語還是和我哋搭訕, 目光也是聚焦在那缸花鯽... "以前我哋時常去釣..."。
說起釣魚, 多年前有兩三個釣季除了常跟人白天租艇去釣大口巴(BASS, 即我們吃的青班)之外, 還有一次夜釣花鯽的經驗。話說花鯽是要夜晚才出動的, 那次是差不多秋涼收季的時候了, 玩開的釣友約定漁佬隻船, 連同其他唔識的同道中人大概十多人, 晚上出發釣夜魚, 目標當然是花鯽。接近收季的九月尾十月, 晚上已經頗凍, 經常得攝氏幾度左右, 知道要著夠衫, 於是外面穿了件厚棉裡外套, 裏面亦幾件打底, 以為頂得順。船行之際, 湖面空曠風勁, 更弊的是那晚 "間中有雨, 雨勢有時頗大"...。心叫大鑊鳥(那時還未識地球原來還有種 "金翅.....鳥" ), 船篷及側圍膠布擋不住那疾風凍雨, 我件棉裡外套 "索吓索吓" 由面濕透落底, 風吹埋嚟凍到發晒~~~ "TEE TUN"~~~。去到隻船停在湖中, 外面黑漆漆的...只聽得風聲、雨聲和水聲, 聲勢嚇人; 還好船上尚有燈光和人聲調劑一下, 沒那麼恐怖。有多少後悔今次之行---但鬼叫你嚟呀, 頂硬上喇...在那惡劣的環境下釣了半小時, 魚絲郁都唔郁, 加上寒風撲面, 濕衫撻體, 個心都早已隨著鉛墜沉了下去湖底了。既無心作戰, 於是索性收手、閉目、縮肩、調息, 坐以待...歸。好在那晚大多數人唔發市, 大家都喺度玩...拋絲、收絲、換餌...再拋絲..., 釣到咁上下已經興致索然, 在我還未失去知覺之前, 收檔回航了...。
返到屋企立即沖個大熱水涼, 有啲鼻水...之後沒有感冒以致肺炎, 好彩! 這是唯一一次的夜釣經歷, 特別辛苦, 又完全冇收獲。貼錢買難受...
講番今晚條花鯽和呢餐...
若非釣友, 未必人人識呢種魚; 一來貨疏, 二來游水的價貴...唔識就未必會買嚟試...
買個四寶飯添, 好過斬料咁單調; 鹵水、燒味幾樣餸一樣一啲, 兩個人已夠食, 又唔使煮飯...
雪櫃還有些隔夜合掌瓜炒豬頸肉及冬瓜粒湯..; 應有盡有, 拎晒出嚟。
游水即是游水, 肉質幼滑, 味亦較鮮, 比上水的好食好多; 這種魚對我是略嫌多細骨, 要食得比較小心...
咁趁機DAP番半杯...
滿足、愜意的一餐!
魚，我都食，但唔識食，種種魚對我來說都係咁上下，只識分肉0鞋肉滑
回覆刪除[版主回覆04/15/2012 03:00:56]哈, 識分肉鞋肉滑(兩者你都梗係會揀食肉滑架喇, HAWA?), 咁咪即係識食囉...
在香港時我不大喜歡食魚的, 覺得買番嚟啲魚唔係幾好食...
阿大...早晨呀......比錢買好過咁辛苦去釣咯....
回覆刪除[版主回覆04/15/2012 10:42:13]MISS早晨!
若連一條食得吓的都釣唔到, 的確會有MISS所說的感覺。辛苦之外, 其實每次一個人的使費都要三幾十蚊---買都唔使咁貴。
不過, 若釣到有一兩條似樣的, 雖然都係使費貴過買嚟食, 但心理的滿足就抵番的了---可惜我釣咁耐, 僅有一次叫做有驚喜...那次大人都有份去, 佢就巴閉, 烏烏吓釣到七八條兩磅以上的大口巴, 要派街坊...嗰次啲魚可能發魚瘟
感覺中, 男人中意釣魚多些, 女人就唔多中意, 行公司同釣魚, 我都覺得悶
回覆刪除[版主回覆04/16/2012 03:49:29]俠女快意江湖, 行多仗義...
阿大...早晨呀...
回覆刪除可能d魚比阿大嫂吸引住呢...
[版主回覆04/16/2012 09:35:55]MISS早晨!
當時我都同大人講, 唔知係咪我有 "陣除" , 啲魚聞到唔游埋嚟...
我喜歡食魚春。有鹹蛋－好送飯。今朝，聽電台報導，多倫多市議會詢眾＞為增加市議會收入＆增加就業，想開賭場。閣下有無收到？
回覆刪除[版主回覆04/17/2012 22:41:00]所以真係好多功夫。先輩的家庭主婦大多專責家務, 現在好多要返工, 邊有閒情心機咁搞法吖...
[肥Ｍ回覆04/17/2012 21:24:04]亞嫲洗魚腸＞塞粒蒜入去，再反轉，用生粉捽。
[肥Ｍ回覆04/17/2012 21:20:59]加條油炸鬼。
[版主回覆04/17/2012 07:58:26]喜歡食魚腸, 芋頭煮魚腸, 魚腸蒸/煎蛋...都喜歡! 現在去食日式自助餐, 大人食秋刀魚, 佢食肉, 我就撩啲寸斷肝腸嚟食, 甘甘哋, 苦苦哋, 幾正。都唔理污唔污糟和有冇毒性咯...
味餸最煩是處理幾副魚腸(連肝)的功夫。老媽以前做嘢比較大路; 大人就十分仔細, 會逐條腸將腸衣(薄而透明的部份)撕晒出嚟, 佢話咁樣無咁腥, 怕肥可以棄掉些膏, 臨煮前才清洗乾淨, 加些胡椒粉略醃。然後到磨芋頭, 用薑磨逐個將芋頭磨成茸(芋頭要唔好生水才好食), 以前老媽會手痕, 所以多數由我磨。將芋頭茸落鑊慢慢煮成糊, 不要黐底, 落埋啲魚腸再煮一陣就掂。雖買了魚腸一大堆, 煮埋唔見乜滯架。出面最多祇有魚腸蒸/煎蛋, 不會有芋頭磨魚腸食的, 祇會在屋企有得食, 因太多功夫, 又賣唔到錢。
呢便冇乜靚魚腸, 都好耐冇食過了...
[阿蘇回覆04/17/2012 00:18:58]生磨芋頭煮魚腸？有味咁嘅餸？想像都好味 , 点整呢？
[版主回覆04/16/2012 11:57:58]大人通常叫若有魚春唔好丟, 留番畀佢...魚春我和大人都食。不過我還是喜歡食魚腸多啲, 以前在香港街市多魚腸賣, 屋企整生磨芋頭煮魚腸(好多功夫! 我負責磨芋頭...), 食幾碗飯的。
知道有提議想在市中心開設賭場, 仍在議會討論階段。估計未必容易通過...
花鯽是否加拿大特產? 香港只有白鯽及黑鯽，白鯽貴黑鯽幾近一倍的，因為黑鯽泥味較重。我都好鍾意食鯽魚，價錢平又鮮甜，在魚檔賣的多是swimmimg的，不過此魚多骨兼且骨幼，小心鯁骨。食緊鯽魚都唔敢多傾偈，好易鯁親。鯽魚同白蘿蔔好夾，煲湯或者煎香後與蘿蔔同炆都好好味﹐講起都想食，一於今晚弄這道菜囉，哈哈!!
回覆刪除[版主回覆04/16/2012 15:43:31]另外還有一種較平的唐山鯽魚, 都試過用嚟滾蘿蔔, 湯的確幾甜。不過滾完湯啲魚肉就覺得鞋, 骨又多過花鯽, 食唔到乜滯。
[版主回覆04/16/2012 15:36:04]矇查查, 唔知港加的鯽魚是否差不多...
呢邊的湖魚中以花鯽和青班(鱸魚科)比較好吃, 亦稍貴。還有鱲魚, 就肉質較差, 也常有泥味, 相對比較少吃。其他的碧古、鯰魚、大鯉魚...等, 更等而下之, 又大條又唔好食, 不會買嚟食。
花鯽骨比青班多, 不過應該不似香港的細鯪魚咁多幼骨, 印象中比較鮮甜的魚都是多幼骨的(?)。大人知我論盡, 讓我食啲冇乜骨的部位, 不過我都要好小心食, 一啖還一啖, 反覆慢嚼, 唔敢魚肉連飯等撈埋一啖吞的...
釣魚 is never my cup of tea....I do not have the patience!
回覆刪除[版主回覆04/17/2012 07:37:05]尤其釣唔到, 真係悶C人架!
目食也愜意。
回覆刪除[版主回覆04/17/2012 12:30:37]那歡迎得閒來 "食" 多幾遍...