說三道四而後食

昨天送完大人返工, 喺街匆匆食埋早餐, 剛好夠時間上去再送小饞返學。回來雖然眼睏, 卻已錯過了慣性瞓覺的黃金時間。
反正瞓唔著, 見近來沒做運動(因為有啲唔舒服, 冇精神), 趁大好陽光, 就過公園行陣, 在隆冬前叉番多少太陽能...。雖然有陽光, 氣溫都祇得三幾度。出齊外套、喼帽、黑昭、虧佬褲...成副武裝出門, 落到街方知唔係幾掂, 因為...大風。唔甘心就咁走番轉頭, 頂硬上在公園兜了一個圈, 影了幾張相---已經開始流鼻水---才打道回府。


上篇的 "仙境" , 現在已經冇乜景了; 那些不同顏色和層次、七彩絢麗的楓葉今日所見已被風吹至幾乎飄落殆盡, 過多一陣恐怕更見空林衰草了...

你隻嘢...跟埋我出嚟曬太陽?

走咁快? 你都頂唔順流鼻水呀? ...走得摩, 冇鼻哥...

天氣雖冷, 這裏就親親熱熱, 一對一雙...


不過呢隻綠頭公曾力拒佢心目中的沙咤利(?)覬覦其 "佳人"...
...事緣另外有隻同樣是綠頭的公游埋上面佢隻乸附近, 佢立即鴨咁腳游快幾步, 埋去趕咗佢走...(真係猛撥幾吓鴨腳衝埋去嚇走佢先停的)
(可惜手腳慢, 影唔到相)

 哈, 見隻公咁緊張自己, 隻乸受喎, LUM到眼都咪埋、陰陰笑咁跟住佢...

----------------------------------------------



今晚東岸夏令時間結束, 重行標準時間, 要將鐘撥慢一小時。

現在多倫多慢香港13個鐘, 星期日晚上又要微調作息時間...





--------------------------------------





早前又覺得腸胃谷住, 而且有啲骨痛, 似是感冒...。一星期前知道有感冒針打, 搵白袍老友告之好似有啲唔舒服, 問打唔打得。白袍老友問了情況, 話係有少少感冒未好,
若祇是引致腸胃輕微不適的感冒應該冇咁嚴重, 都可以打得(佢喺出便同另一個病人說, 你好番先嚟打喇...。) 。打完針重醒咗兩隻幫助暢通的藥給我, 不過...我冇食。免得過唔想依賴啲藥..., 相信等感冒過咗, 就自然會掂的了。
呢一兩日情況已經改善。





--------------------------------------


...凍凍哋, 大人又放假, 今晚不如整番餐打邊爐...

(影後檢討---冇用閃光燈, 但可能影時身或相機遮了天花的燈光, 所以部份較暗...)

一打邊爐, 大青班有難矣

買了兩隻殼蠔---殼巨其外, 肉奀其中...失敗。

大人例舞龍頭