加國饞人

2012年4月16日星期一

新綠

多倫多剛過去這個冬天不太冷, 雪也不多。對夏蟲來說, 好得很! (smile)

窗前這棵樹早一兩星期陸續出現許多葉苞, 近幾天爆葉了...

CIMG1251

2012年4月14日星期六

今天接了大人放工, 晚上未決定煮唔煮, 又唔知食乜好(昨晚已吃了日式自助餐!), 順道即管去巡巡超市。

去到魚檔見有一缸游水大花鯽, 價錢$9.99/磅, 大人眼睛立即發光。游水花鯽甚少有(有時會有上水的), 有亦未必大條, 從前應該是 "釣口魚"。印象夠斤兩的游水花鯽在超市從未低過雙位數字一磅, 愈大條愈貴, 一般$13/14一磅, 似乎還見過$16/磅的。大人就算見到, 都會嫌貴, 寧願唔食。

今次見大條又略平, 當然有殺錯, 冇放過!

大人語帶興奮請魚檔哥仔在整缸那十多條花鯽中揀條最...大的, 哥哥仔聽見也笑了。哥哥仔好心機, 魚網兜來兜去, 終於揀了條...1.2磅的。

劏緊之際, 旁邊有人企埋嚟, 不知是自言自語還是和我哋搭訕, 目光也是聚焦在那缸花鯽... "以前我哋時常去釣..."。

說起釣魚, 多年前有兩三個釣季除了常跟人白天租艇去釣大口巴(BASS, 即我們吃的青班)之外, 還有一次夜釣花鯽的經驗。話說花鯽是要夜晚才出動的, 那次是差不多秋涼收季的時候了, 玩開的釣友約定漁佬隻船, 連同其他唔識的同道中人大概十多人, 晚上出發釣夜魚, 目標當然是花鯽。接近收季的九月尾十月, 晚上已經頗凍, 經常得攝氏幾度左右, 知道要著夠衫, 於是外面穿了件厚棉裡外套, 裏面亦幾件打底, 以為頂得順。船行之際, 湖面空曠風勁, 更弊的是那晚 "間中有雨, 雨勢有時頗大"...。心叫大鑊鳥(那時還未識地球原來還有種 "金翅.....鳥" ), 船篷及側圍膠布擋不住那疾風凍雨, 我件棉裡外套 "索吓索吓" 由面濕透落底, 風吹埋嚟凍到發晒~~~ "TEE TUN"~~~。去到隻船停在湖中, 外面黑漆漆的...只聽得風聲、雨聲和水聲, 聲勢嚇人; 還好船上尚有燈光和人聲調劑一下, 沒那麼恐怖。有多少後悔今次之行---但鬼叫你嚟呀, 頂硬上喇...在那惡劣的環境下釣了半小時, 魚絲郁都唔郁, 加上寒風撲面, 濕衫撻體, 個心都早已隨著鉛墜沉了下去湖底了。既無心作戰, 於是索性收手、閉目、縮肩、調息, 坐以待...歸。好在那晚大多數人唔發市, 大家都喺度玩...拋絲、收絲、換餌...再拋絲..., 釣到咁上下已經興致索然, 在我還未失去知覺之前, 收檔回航了...。

返到屋企立即沖個大熱水涼, 有啲鼻水...之後沒有感冒以致肺炎, 好彩! 這是唯一一次的夜釣經歷, 特別辛苦, 又完全冇收獲。貼錢買難受...

講番今晚條花鯽和呢餐...

若非釣友, 未必人人識呢種魚; 一來貨疏, 二來游水的價貴...唔識就未必會買嚟試...

買個四寶飯添, 好過斬料咁單調; 鹵水、燒味幾樣餸一樣一啲, 兩個人已夠食, 又唔使煮飯...
雪櫃還有些隔夜合掌瓜炒豬頸肉及冬瓜粒湯..; 應有盡有, 拎晒出嚟。

游水即是游水, 肉質幼滑, 味亦較鮮, 比上水的好食好多; 這種魚對我是略嫌多細骨, 要食得比較小心...

咁趁機DAP番半杯... (big grin)

滿足、愜意的一餐!

2012年4月12日星期四

偶讀、自況

西江月辛棄疾

萬事雲烟忽過，百年蒲柳先衰。而今何事最相宜？宜醉宜遊宜睡。
早趁催科了納；更量出入收支。乃翁依舊管些兒，管竹管山管水。

---------------------

自說自話...

往事如煙, 一轉眼渾渾噩噩就過了幾十年...
虧虧哋, "蒲柳之質望風先零" ---一吹風就好易傷風感冒而涕零, 都係 "零" ;
詞人說佢宜醉宜遊宜睡; 自己就宜吃宜動(運動)宜睡---偶然飲一兩杯, 倒從來未嘗醉倒, 亦不敢飲醉, 辛苦兼傷身也。為食、唔夠瞓, 當然是宜吃和宜睡了; 至於宜動 , 就是為了起碼的健康和可以繼續宜吃而逼於無奈的 "宜" , 不過那所謂的 "宜" , 都祇是應卯應卯而已;
四月底是報稅的限期, 剛剛準備好了...
生活逼人, 一向都要量入為出...
雅、仁、智, 都冇我份; 庸俗市儈之徒, 管的那 "些兒" 是另類的竹(戰)、草(田、谷的草)、水(金魚缸的水)...。 (tongue)