歲晚

今天早上開始又落大雪; 落、落、落..., 不停的落;
預告晚上至明早大槪會有30-50厘米雪, 大人可能唔使返工(?)...


-----------------------

後記(東岸6:35 AM, 送大人出門前)：工照返, 船照撐...都唔知學校附近剷咗雪未..
......

去到學校範圍, 剛好遇上剷雪車在開工, 清理了些路口的積雪, 才可將大人送到門口; 否則要在路邊讓她下車行入去...
剷雪車就等我離開後才繼續剷、剷、剷...; 雪則繼續落、落、落...

哈, 幾好意頭 ~ 又加冠(官)、又步步高升...

-----------------------


雖然落大雪, 今朝都在人家晨咁早返工之時就出去剪髮
一向幫趁開附近的女子理髮廳
好在夠早、夠大雪, 去到仍未開燈, 第一個衝入去, 不旋踵, 三四個女士隨後陸續殺到...
齋剪; 三下五落二, 唔使十分鐘搞掂起身, 歲晚冇(未?)加價喎

接大人放工, 路面情況愈加惡劣, 積雪令行車好似撐船...尤其轉彎又擺又跣

出面下雪......車窗的是水, 因為車內尚有微弱的暖氣(水箱的水膽壞了...)

去飯堂開餐, 食完大人又要去買些年糕...

終於返到屋企, 路上交通依然擠塞混亂

學校同聲同氣的同事送啲, 又送番啲畀人

晚上份工返埋今日, 收爐小休咯...
歲晚今日且逢瑞雪, 謹以此聯送給各位網友和新知舊雨, 希望大家時時好景, 日日健康!!
草聯不工, 有識者心照不宣...


     霜   雪
     松   兆
     康   年
     健   豐

好頭好尾

歲月在無聲中流逝。話咁快又踏入了二月...

今天已是農曆臘月廿四了; 而且, 又是一年二十四節氣之始 ~ 立春。

雖然距離月中...還有兩個星期, 鑑於稍後農曆新年期間, 外面搵食艱難, 於是揀今日早些少約家人出嚟一齊食番餐飯。


食一圍圍食到覺得無乜新意
今次去試間未幫趁過的, 間嘢乜套餐都冇



嗯, 有驚喜喎...

鎮店之鷄 --- 西關荔灣雞
(店名 "荔枝灣"; 西關即現時的荔灣區(?)。據說從前西關住的多是有錢人, 有所謂的西關大少, 家境富裕, 食嘢奄尖, 有時重 "撟" 口 "摻" 手)
話隻雞要訂;  去到略早(其他人都未到), 坐落; 老細賣口乖, 說今日的雞已差不多訂晒, 見我哋人多, 已經叫定廚房同我哋留了一隻(我哋都未話要食呢味)
點知到真係落單之時, 伙記居然說現在只剩番半隻, 之前被別枱人客 "搶" 了半隻...脹然!
算喇, 諗住試吓好唔好食先, 半隻就半隻...
其實半隻都頗大碟
老細說隻雞的整法, 醃隔夜, 然後雞腔放些雲耳...看賣相和顏色, 猜想是 "煀" 的製法
隻雞就的確醃得頗入味, 味道有新鮮感, 異於一般所謂魚露雞...者, 肉質亦幾好; 就是比普通的製法貴...一半都唔止。
至於從前西關食制是否真有此雞, 還是巧立名目, 就...不得而知了。

要芋頭又貴啲, 但我一向喜歡用靚芋頭(千萬不要生水芋頭)去扣, 好過用梅菜; 老豆以前整都一定是用芋頭...
扣到夠火候, 好些芋茸融入了砵內的醬、油、汁之中（生水芋頭就沒有這個效果！)...
如今自然無復當年勇, 扣肉要去肥, 掏一小羹肉汁撈飯要先隔油...淺嘗輒止, 係咁意而已
咁大砵, 唔怕食唔晒, 長江有後浪吖嘛...


羊腩煲, 幾乎舊舊有皮有膏, 質、量俱佳

鮮波蘿汁酥炸排骨, 當然又收貴過普通的生炒排骨...
不過真係好食啲, 啲汁十分好味
廚神許為食過中的第一

荷豆炒臘肉
平餸, 但料碼卻不馬虎, 啲臘肉唔肥乜滯, 塊塊都食得吓; 味道唔錯...
,


蜜汁煎蠔, 大人食底唔食面, 我就相反

炸雞軟骨
人多啱食, 每人唔使食咁多
用來佐酒, 一流(講起唔記得影啤酒...)

最正和最杰... 正的是食味, 杰的是份量和價錢...
想食鱔, 諗住家人個個都喜歡食
見例牌都賣成$22(應該是一磅左右?); 相信一個例牌大舊啲一人都冇一件
把心一橫...成條嚟, 說唔使要太大條, 拎嚟過目, 報說六磅(??哈, 預咗多少折扣架罅...), 一鱔兩味...

條鱔夠大, 自然甘腴, 味正肉爽
一般蒸出嚟會好多油, 佢可能做過多一重功夫(泌去些油汁/換碟?)還是怎樣, 碟底相對乾爽, 油、汁俱不多, 而鱔件身上的調料就依然冶味

這個製法叫雙金燒鱔王(?還是流沙...)
一金是鹹蛋黃, 另一金是南瓜, 至妙還有幾塊薯片, 吹脹!
十分精采!!
每舊鱔都甘腴、香口, 而且啖啖都有均勻的蛋黃鹹香...

除廚神讚賞之外,小饞食到半途..."呢度啲嘢好好食! " (可能嗰時已經比較嗒清楚, 在回氣時才得閒開聲品評)
其他唔出聲的, 亦都頻頻舉箸...

哈, 呢餐似乎人人都十分滿意!

半日騰

今日大人趁學校有一日私假, 一早起身去申請換領新護照。

出乎意料之外, 不是太多人。排隊、攞籌、查核資料...; 不用半小時已經全部搞掂。上次我要個幾鐘...


搞掂出嚟, 途經購物中心, 水靜河非, 店舖都仍未開門(未夠十點)。

幾靚仔喎...做乜兩隻眼仔好似耷耷哋, 冇乜神咁架...
牙噬噬.....就快要走, 依依不捨?
託賴今年尚好; 麻煩請交帶來年接你位的兄弟帶多些少好嘢嚟添吖...

---------------------------------------


然後又到我去續車輛牌照
冇得睇通勝, 今日係乜日子? 居然又係得小貓兩、三隻; 入門口企一企, 即刻有人招呼。
呢度重快, 唔使十分鐘搞掂...

架車年事已高(人都係喇...), 每隔兩年續牌都要先驗廢氣, 測試合格才可以續牌。上月中去驗並且換油, 話車底條廢氣喉又生锈又穿窿, 要整咗先驗得。
冇法喇, 成條喉喚晒, 又唔見成七百蚊。修車師傅還說, 個水箱水膽應該壞了, 所以在行車時的溫度升唔起...(? 我只明白, 咁就冇乜暖氣入...)。回說若不影響安全, 下次換油時再整喇...
十幾年車, 不過里程不多。車身還未見有銹蝕, 車頭副偈又似乎尚好。這個年份的車折舊到已經唔值錢, 車行可能係咁意出一千幾百收車, 當然心有不甘。索性諗住揸到架車唔郁得或是必要一大筆維修費之時才諗換車囉...; 而且, 目前有時會讓大人一個人自己揸出揸入練多啲, , 等佢 "玩" 多兩年先換車都好...






---------------------------------------


一早打算做完嘢同大人去食自助午餐。兩單嘢搞掂, 仍有時間, 行了陣公司, 去到才剛剛開門...

今趟冇加錢食刺身...

晚餐慳番;
今晚夜啲會同寵物嬉戲, 到時食少少消夜...





---------------------------------------



再記 3/2/13 00:25


買了放在銀包幾個星期都未對, 今朝飲完茶心血來潮...
四獎 ~ 中咗四個字; 不過三注之中都唔知邊注中...; 在我來說, 已是難得的大獎!

昨早商場偶遇......
龍哥臨別秋波醒嘅?!...多謝晒... 收咗錢...我又買咗些少呀...