今晚小饞受其姑媽所託, 兩個合作...一個出錢、一個出力, 喺屋企整餐請我哋食。
佢哋唔知我早幾日腳痛和感冒...
病病哋都仍然記得...是差不多的日子...; 雖然無關呢餐, 我哋都專登買啲齋鹵味拎上去...試吓好唔好食...
歲月匆匆, 人也匆匆, 不經不覺又接近一年了
一入到去就撲埋嚟團團哄, 知道實有嘢食?
(我和大人一齊, 佢多數哄我; 都不常見, 咁好記性我會畀嘢佢食?)
斯時狗狗的內心世界可是這樣 ? --->
聽話、甚乖; 已嘗了甜頭
相當黐人, 安坐在我大脾上...咁影張靚相喇
一叫回眸...
放番入竇等開餐咯..
已經同你玩咗一陣喇....哈, 使唔使咁扮個可憐、落寞樣呀?
咪有得食囉...不過, 細佬梗係話... "唔好食住...等叫先好食! " (等待中的為食狗狗, 喺咪想...#*$!*@!+!...呢)
差不多半個月沒去做運動了, 順便上磅
近日腳痛又感冒, 胃口略差, 果然輕了些少...
不過, 一飲食 "正常" , 相信(應是肯定!) 又番嚟架罅
酒...就慢慢嚟(仍有顧忌啊...
), 先嚟杯橙汁濕吓口...
盒齋鹵味中的 "雞腿" ; 鮮見!
中間真係有碌棍仔...哈, 甚有新意, 質感亦似似哋
小饞的杰作...
龍蝦湯
不惜工本, 買了隻近五磅的活龍蝦...
所以見有大舊鮮龍蝦肉, 認真真材實料;
完全是西餐的做法; 賣相、味道都十分掂!
小饞自製的 GRAVY
重驚唔夠食, 焗多幾件炸魚塊
限量; 大人仍強抽了 1/4稅...
舊牛肉夠肥, 嫰滑; 不過僅吃了一 "小" 片(其小也, 是相對平常所吃的份量來說的...
), 搭多半舊骨...所謂半舊者, 就是大人用刀叉先食...食到無處落刀之時, 剩番嗰半舊就PASS畀我...用手揸住啃...
食多箸菜同意粉囉...
一向自己的身體狀況其實是應該要稍為戒口的; 不過每次食嘢總係都貪一時之快, 食咗先算, 好食就會食多咗, 於是久不久就...
今回仍在風頭火勢的邊緣, 算有啲節制罅!
--------------------------------------------------
歸途又遇封路
如此場面唔慌好事
兜路停在附近八卦一下...
警車、救護車、消防車...連電視台都有車在, 且架好了兩部攝錄機在封鎖範圍的外緣...
肯定是大鑊嘢
出事現場有兩三輛打横打掂的汽車...更令人觸目驚心的是, 離遠還見到在路中心有幅黃布蓋住了些甚麼.......
不清楚詳情; 照現場情況, 很可能有人貪一時之快, 在路中橫過馬路...
我自己在晚上揸車會更加戰戰兢兢; 亦不時告誡大人加倍小心...
自己 "眼水" 麻麻, 幾乎瓣瓣 "缺陷" 都有些; 尤其有散光在晚上駕車會更被路上的那些光影影響視力...。
加拿大住宅區的路段, 特別是僻路, 入黑後都頗為幽暗, 有些路段似乎是完全沒有街燈的(?), 僅靠車頭低燈的照明, 司機的視野和 "能見度" 相對日間會差許多許多。
自己有不少經驗, 去到近距離才見到前面的行人路有堆嘢喺度---原來有個黑衣 "深色" 人行緊!
即是說, 好多時離遠不易察覺有人; 若果那人唔生性, 突然走出馬路, 咁就真係可能避無可避, 到時各安天命的了。
司機和行人, 都應當十分小心, 不要貪一時之快, 累己累人...
後記
今早特意看看昨晚在場的那間主流電視台的新聞(中文報紙還未見報道)。
大槪的情況是...
"當時一名五十九歲路人(沒有透露是何族裔, 不過附近多華人居住, 晚上一個人走過馬路, 很大可能...)橫過馬路, 被一輛汽車撞倒致死。警方正追緝一輛肇事不顧而去的COROLLA..."
我們熟悉出事地點的交通及環境, 幾乎每日都會經過。
那路人橫過馬路之處並非紅綠燈位置, 也沒有行人過路線(距離該處三、五分鐘腳程就前後都有! ); 上、下行車線中間有一列稍長而沒有豎立欄杆的安全島分隔。
不知意外當時如何發生, 不過肇事車輛事後不顧而去(HIT AND RUN)就無論如何都肯定衰梗!!!
COROLLA只是小型汽車, 能夠將人撞至即場死亡, 推測當時車速顯然甚快, 有可能超速, 出事的一刻前並且沒有任何緊急煞停的意識和動作(?) ; 若然, 即是可能根本看不到那路人!!!
