閒扯

近幾天身體又有些不大舒服, 懨懨悶悶。

天殘腳不知如何, 近來總是時好時差, 難捨難離。斷斷續續的吃藥, 都吃怕了

。

前兩晚更加攞黎衰, 吃了些早前見又平又靚、唔怕C而買來吃的富貴杮...。

所謂唔怕C, 事緣早幾年一次回港已有前科。有餐吃粥之後再吃杮, 半夜竟然肚瀉不止。瀉足日幾兩日, 終於要睇醫生收科。於是懷疑自己腸胃對杮敏感(即所謂濕熱?), 自此對杮頗有戒心。雀戰那晚和舊同事出外吃得稍為肥膩, 回來再吃了半個杮(已不敢多吃!)。嘿, 睇機之時, 開始覺得周身唔舒服, 胃悶、肚谷、發冷..., 知道唔掂, 連忙機也不睇, 和衣走去擁被攤抖, 睡了一覺, 總算捱過。不過目前肚子仍然時有絞痛, 總是不爽...; 看來今天又是時候往探望白袍老友...。


>>>>>>>>>>>>>>>>>>>>>>>>>>>>>>>>>>>>>>>>>>


早前網友問這邊是否有大風雪。

氣象台早前已預告前晚會有一股雪暴從美國吹上來, 我們已有心理準備。雪下了整整一個晚上, 臨天光又聽見對面社區中心那些剷雪車開工, 在倒後時不斷發出的 "嘟...嘟......" 的熟悉聲音。

昨天天未光送大人返工, 雪仍下得很密。小街積雪仍未開始清理, 車走在其上, 輪胎咬地奇差, 感覺仿似行船。自己一向沒換雪胎的習慣, 只以技術搭夠...。

剛才拍的照片。
經過一天, 周圍的積雪基本上已清理好...。今周餘下時間似乎可以喘一口氣, 不過, 據說下周又黎過...

>>>>>>>>>>>>>>>>>>>>>>>>>>>>>>>>>>>>>>>>>>




以為昨天會有運行, 原來實際只是差強人意。

有隻揸了多月、博炒的一隻毫子股, 沽出賺了一轉兜回之後, 就輾轉下跌以致反而要入肉。死牛一便頸, 不為所動, 一於守株待兔。早陣在低位徘徊多時, 近週又突然炒高幾日......隨後停牌。忐忑不知是禍是福, 卻原來是有收購行動。昨天復牌趁好消息大幅升了毫幾, 跌市之中, 登上了升幅榜前列。不敢怠慢, 當然先行沽貨獲利, 尾市果然回軟; 貪心又買番多少, 再等炒多轉..........。

至於愛股昨日尚挺得住, 其餘就乏善足陳。




>>>>>>>>>>>>>>>>>>>>>>>>>>>>>>>>>>>>>>>>>>


HKT 11/12 10:32 am
後記

白袍老友終於收到H1N1流感疫苗, 今天順便打了。

姑娘強調針口今日唔痛就明日痛, 這個我不擔心。哈, 曾經痛風難為痛(不過據說痛的程度, 生孩子是數一數二?), 自己痛風發作之時, 碰到痛位那種攞命痛法, 真不足為外人道, 難道還怕那區區針口之痛?!略覺不安的是, 有人對疫苗的各種嚴重反應...。

知我腸胃欠佳, 大人提議煲粥食, 於是預先煲定粥, 睇完醫生去買魚及其他。

兩磅幾的青班......投大人所好, 有大食大, 食唔晒寧願留番第二餐

油炸鬼、腸粉、豉椒牛肉炒麵

白袍老友換了隻藥, 藥房的配藥小姐交帶要食飽些...(當然食唔晒喇)