在廚神家團拜之後本來以為簡單了事, 可是廚神大伯一向客氣好禮, 又特別約了今天上嚟寒舍...。
人家咁好禮, 自己豈能怠慢, 張羅買定啲酒、食, 開定枱麻雀恭候; 並叫廚神訂枱晚上食飯。
這兩天又凍番好多, 佢哋由屋企嚟要揸個幾鐘車程。
嘩, 又拎枝嚟, 見我以前同佢哋係咁隊? 唉, 都今非昔比罅...
團拜一次過搞掂, 大人諗住今年可以慳番執拾啲功夫, 哈, 點知人算不如天算...
平時張枱甚少人氣, 堆吓堆吓嘢, 日子有功, 邊有咁 "整潔" 吖?
一邊打、一邊飲、一邊食、一邊嗲...
三個男人都飲兩溝 ~ 健力士生啤溝喜力
買了 3+6, 只消耗了 2+2 ; 不過黑啤比較大罐, 幾乎是一開二;
哈哈, 剩番的我慢慢歎
酒飲得唔算太多, 但盒牛肉乾食吓食吓就冇晒, 大伯好鍾意食
...終於今戰抽水抽了三十幾蚊, 大人又贏了廿零蚊 ~ 哈, 果然應了網友昨天的口彩, 發了些新年財, 多謝德肋撒 !
又係去上次間荔枝灣食飯; 食過幾好, 諗住介紹畀大伯試吓
今日星期日, 要分兩輪時間訂枱, 我哋訂六點
點菜...點了兩、三樣都話冇 ~ 鵝乸煲冇、上次的西關荔枝雞冇(上次都說要訂的), 鱔又冇例牌, 要成條叫...我哋冇上次咁多人喎...
終於老細揀了條比上次較細的鱔, 唔夠五磅...OK喇, 一心想大伯試吓個雙金燒鱔, 別處未必吃到...
差不多都係上次啲餸, 因為食過唔錯, 而且大家都啱食
辣子炒雞 ~ 唔辣乜滯, 我都食得掂, 不過唔知關唔關呢味餸濃味的事, 食食吓忽然發覺條脷又有個血泡...
娃娃菜
有得幾個人, 幾乎例牌叫嚟食
上次六磅, 今次差啲五磅, 今次似乎重多啲...
大伯及其夫人都十分欣賞個雙金燒鱔
又扣肉汁, 又蒸鱔汁...
啲飯嚟完一個又一個, 當然我最捧場喇...
一晚銷咁多南瓜, 大把下欄做糖水...
呢個年，目食口食唔少，早幾日個胃頂住，一開工就幫襯醫生..
回覆刪除[版主回覆02/18/2013 23:12:14]坐寫字樓或坐係屋企, 食得肉多, 尤其那些煎炸、燒臘之類, 個胃的確較難負荷!
我雖係食慣了肉的食肉獸, 不過偶然食個BURGER(通常都係淨食包, 若加汽水、薯條更弊), 個胃有時就會有灼熱的感覺, 尤其食完不久去瞓, 瞓醒好多時個胃都會唔舒服。
有時BK有贈券, 買一送一, 貪便宜都會買兩個返嚟慢慢分開食, 大人會買個生菜/青瓜之類洗好, 等我用來送包, 咁對個胃就會好啲...
[shadow回覆02/18/2013 21:08:26]其實而家屋企都冇整賀年餸嘞，團年食外賣盆菜。細路時食嘢根本唔知飽，過年時更肆無忌憚。不過初五返工嗰食咗個叉鴨飯，少飯走汁，但肉唔少，食完後就頂住嘞....平時餐頭已習慣少肉嘛﹗
[版主回覆02/18/2013 20:18:52]哈, 我諗起以前, 由做冬、團年至開年幾餐, 每餐幾乎必有蠔豉發菜一味; 一來嗰幾餐比較多餸, 蠔豉又較難消化, 於是新年期間個胃常飽飽滯滯, 連噯氣都有浸蠔豉味的。
[shadow回覆02/18/2013 16:34:13]食咗兩日藥都OK嘞。見醫生時，佢陰陰笑話：食滯咗呢﹗
[版主回覆02/18/2013 12:23:57]睇完好啲鬆啲罅, HAWA?
其實或者未必完全因為食...可能是中了招, 感冒病毒入了腸胃搞搞震的緣故 ~ 咁就食乜都覺得唔妥;
大人週初又係冇胃口, 腸痛, 但無痾、嘔, 校內有幾個同事又說有類似癥狀...
我畀佢食了幾日調節腸胃啲藥(可以舒服啲, 但若是感冒病毒而起, 都要三幾日才可以恢復正常), 佢冇胃口又食清咗, 現在好似冇乜事咯
加記有冇蛇食﹖
回覆刪除[版主回覆02/18/2013 12:51:07]我見過有些酒樓食肆有蛇羹賣, 我似乎都唔記得喺邊度食過一次, 食完都唔知有冇蛇絲的, 亦唔覺好好食。
呢度超市好像有急凍蛇碌賣, 我諗唔慌好食...
我過年到依家最豐富都係呢餐目食咯.......過年金多寶又無我份...咁大個人又唔會周圍去逗利是...所以我只係發霉咋......
回覆刪除[版主回覆02/18/2013 20:57:46]本來我都想買番幾拾蚊過年金多寶希望蛇年即發的, 點知到時又冇件事...; 咁即係慳番幾十, 亦算小發
哈, 新年期間又守口, 又獨自守營(?), 府上許是爐火不盛, 外面又店少人多, 難以搵食, 那自然要食得比較清簡了...。遲啲補數囉...
利是乃小焉者, 升職加薪和金多寶才是MISS的鴻鵠之志吧...
好大碗飯！食食吓出血泡－食辣子＞熱氣！
回覆刪除[版主回覆02/24/2013 12:15:27]應該係囉, 經驗是一食椒鹽、濃味爆辣的餸, 就好易中招。