風雪36小時

昨朝大風雪吹過美國東岸, 北上抵達安省!

一如上篇<歲晚> 後記, 今天繼續落, 送大人返工之時路面啲雪已經唔少嘢...
係咁落、落、落...., 未停過。

湖邊一帶受影響最嚴重, 學校要停課。大人學校所屬校區仍然要返學, 但校巴全部停駛。

送完大人返工, 都唔敢去食早餐, 速速返歸。

對面社區中心一片白茫茫, 停車位、車路、行人路..., 俱不辨焉!
剷雪車不停地啲、啲、啲(剷雪車倒後行發出警示的聲音), 車前倒後, 剷、剷、剷...

屋企出面

從 "雪糕" 大概可見地面雪深厚度

此君頂帽幾型, 有條晶瑩的雉雞尾

連有蓋的露台都飄了不少雪入嚟

今天學生返得小貓三幾隻, 大人早返, 下午可以早撤, 我再撐船去接。
沿途見不少剷雪車穿梭, 路上的車則比平日稀疏得多。大路啲雪雖然剷完又即蓋, 車行尚可; 不過一些小路及路口交界的地方許多仍見厚雪, 一唔覺意走入其中, 隨時進退不得, 十分狼狽無奈; 這情況在路上屢見不鮮(自己都試過)。
學校範圍今朝剷完雪, 接大人放工時又已積得頗厚, 架車車身矮, 唔敢轉入去...。大人醒目, 久不久出來望吓, 望見車到, 自己施展輕功......之重的 "踏雪深印" , 慢慢、慢慢好似機械人咁逐步、逐步踩出嚟。
風雪飄搖之下, 返到屋企停車場泊好部車, 驚魂甫定, 兩個都鬆了一口氣。

...........
...........


本來今晚約了上去細佬處食飯, 接完大人放工, 見路面情況實在十分惡劣, 佢屋企附近的小路肯定未曾剷雪, 都係唔去為妙。
諗吓我哋自己今晚食乜好...

咁嘅環境, 一係喺屋企食, 一係...
咁梗係後者喇
隔離日本舖執咗之後, 未幫趁過; 天意可能要我哋今晚去試吓。

早啲行過去

走廊窗簷外面堆起了個鬆鬆的雪丘, 呢場雪可一點不稀鬆!

盈呎...及脛
有啲地方要踩雪行, 鞋及褲管都濕了
商場有部車又畀雪困住, 搞一排先郁得番

噓, 兩個世界

嘩, 一開始即嚟料 ~ 頗辣

烤魚 ~ 搵到個豆豉飄香, 唔辣的
用青班或鱲魚, 烤香後放湯, 有辣有唔辣, 滾住食, 配料另加, 逐樣計, 多少隨意...
我哋要了豆腐和粿條

食鱲魚; 青班要價太貴, 而且總覺得新鮮(?)青班 "烤" 嚟食, 有啲浪費
魚開兩邊
先試了一口, 嗯, 烤的時候應該落了孜然粉(就是同事說的那種新疆味),
大人......話...好在冇食烤肉串中招那次咁勁

要多個三鮮餃

整杯黑啤, 讓大人黐兩啖解毒...有少少苦澀, 好味!

飯桶少不了

哈哈, 奇怪! ...知道西域風味味道乸脷, 餐後解藥?!

店方的解藥似乎藥效不足...
自己再清餘毒
食住解藥之際, 見外面啲風雪已經停了, 威脅亦解除了......