一味餸, 話當年

今日大人花了大半天時間, 炮製了很大可能是這星期唯一的一餐住家飯...


豆腐煮班尾

花生炆豬尾

節瓜清補涼煲豬(月展)

印象中過來之後, 從未買過豬尾食; 今回是首次。
大概半個月前行超市, 見有一PACK PACK的乾淨豬尾, 睇落幾靚, 而且份量不大。心血來潮, 竟提議大人買包。大人當時可能都有啲愕然, 以為聽錯, 吓..., 唔係一向很怕那些肥膏的嗎?!

怕C還怕C, 然而, 人總有啲嘢平時收埋(藏在潛意識裏?), 伺機而發的嘛...
當時見到包豬尾, 不期然就諗起 "花生炆豬尾" 呢味餸!

其實以前屋企都似乎冇乜整豬尾食, 咁點解諗起...? 可能以前細個喺大牌檔見過那些一盤盤的餸有此一味...諗住幾好食, 自己未食過卦?!

大人將豬尾剪呀、剪呀..., 剪晒那些皮和白雪雪的厚膏, 剪完得番一半咁滯。有皮的祇留番四截(共有四條)短短的尾中之尾, 讓我有得過吓口癮!

煮得幾入味, 相信會好食過從前有得睇、冇得食的那些..., 當然風味自亦不同。而且, ...那時乜都唔識C, 現在就怕得要C....




依稀的前塵, 前塵的依稀...

(下面兩張相複製自網友苦心搜羅的香港舊照, 對我來說, 彌足珍貴。在此借用, 多謝! )

印象在還未入學的年紀, 自己已開始住在這條斜街的中間位置...

這間茶樓, 老豆以前晏畫有時蛇王出嚟, 間中帶我上去飲 "下午茶" , 炒碟干炒牛河/肉絲炒麵, 甚至食個錦鹵雲吞。以那時的環境來說, 應該已經十分難得!

茶樓後面和舊樓中間的巷仔, 行入啲有幾個大牌檔......潮式魚蛋粉麵檔、咖啡奶茶檔、粥檔、粵式平價小炒檔, 此外, 還有檔是打冷式擺開晒現成的一盆盆的平餸, 當時覺得吸引 --- 好似有大豆芽煮XX、花生炆XX(豬尾?)、鹹菜煮門蟮......

到大一些, 間中有人濕啲零用錢, 就心思思去整碗魚蛋粉或是雲吞麵, 落大半羹辣椒油是指定動作...。那時的大牌檔前面有條長橋櫈放了三幾張矮櫈仔, 去到就貪過癮,  "擒" 上去坐...。一邊食到頭頂標汗, 一邊聽著收音機播那熟悉而音調高亢的潮州音樂(是古箏曲 "寒鴉戲水" 吧?!)

有時又會幫阿婆去買杯外賣咖啡...(要自己拎個漱口盅去裝)

至於那兩檔食飯的就好少幫趁, 冇乜機會食。經過得過望字...

有些人或許早慧又記性好, 成年以至老了之後, 還可以清楚記得兒時的生活片段。我對於童年記憶相當模糊, 記得啲(少少)唔記得啲...。

唔使做加上年紀大了,  我都似乎開始有番些少 "慧根" 出來 -- 不過, 那是 "懶(慧的???)根"  ; 從前礙於要搵食, 現在則可懶得懶!

睇番這兩張相, 喚回了好些童年/少年時代矇矓的記憶...