美東遊(7)

21/8/12 星期二  (第四天)


行程最後一天。
清早離開紐約, 起程返回多倫多了。
要整天坐車, 中途會在一個大型購物商場停留兩小時許自由活動 --- 食晏, 買吓嘢...
回程經過較多山區, WIFI 時有接收失靈的情況。多倫多地勢平坦, 湖光是有的, 山色卻闕如。於是叠埋心水, 睇一陣山區風景、影吓相, 眼睏又瞌一陣...

山巒叠翠, 都幾養眼

山區比較潮濕, 有霧

坐到...有啲痛, 終於到商場, 可以落車鬆吓。

嘩...104間, 大人心情想必興奮 , 祇歎時間唔夠r啫

貢咗幾間, 剩番時間己經不多。匆匆買兩隻, 囫圇吞狗, 唔使十分鐘搞掂。
食完續行多一間, 大人仍意猶未盡, 提醒佢夠鐘上車罅, GUT GUT吓有排行番去架...

又要再坐近三個鐘先到邊境過關

返到瀑布區

過關前去免稅店諗住買箱啤酒, 原來全部係24罐庒, 冇12罐庄的;
平係平, 買咗就梗密密飲, 24罐實在太多; 而且大箱好重, 大人腳傷已幫唔到手拎行李, 又買了些衣服, 咁多嘢都幾難拎, 終於放棄......買啤酒, 係咁意買枝紅酒算數。

坐旅遊車陸路入境返加拿大好易話為, 今回真係唔使我哋落車檢查。兩個人上嚟旅遊車, 一個做前, 一個做後, 我哋揚吓本護照就掂, 相都唔使望。收了報關表, 買幾多嘢入境問都冇問。好似早前我哋囫圇吞狗咁, 不過我哋吞一隻, 佢哋最多吞隻半咁多時間, 好快搞掂。

兩個小時之後, 廚神同妹夫嚟落車地點接我哋回家... 之前, 梗係一齊去食埋飯先喇...



掛住講旅途花絮, 全部慢半拍甚至一拍, 幾乎食晒先記起未影相...

燒鴨半隻

黃旗班兩味：西芹蜜豆皇子菇炒球、豆腐蒸骨腩(好在重有啲)

梅汁排骨

兩人份...今回連我都收獲甚豐,  底底面面都有...

早前想吼吓買件羽絨背心, 不過嫌多數都臃腫漏 "暴", , 穿起漲卜卜, 好似機械人。而且羽絨含量有番咁上下、衫型稍佳的, 又實在覺得太貴。
今次無心插柳...
這件羽絨背心減價(雙面架, 可以反轉著), 現在大概原價五折, 若非減咁多, 我一定唔捨得買...
現在加幣兌美金已高過平算, 而且加拿大一概收13%稅, 美國100元以下消費祇收4%...難怪近來加拿大人過境購物蔚然成風, 一如中、港情況...

美東遊至此圓滿結束!