報團

終於報了團!

每年的暑假, 若不是返香港, 有時會想揀個短程的旅行團同大人玩幾日(唔好太耐, 太耐在途中我就會想返屋企架罅...)。

我本來有興趣過西岸的溫哥華走走, 大人亦喜歡。不過暑假的機票實在太貴, 就算跟團 ~ 一程飛機一程車, 個人團費(七至九日)未計膳食, 都差不多等如一張平日來回香港的機票了。我們總是嫌貴 ~ 旺季唔抵吖嘛! 自己的如意算盤, 是等機會搵次自由行, 他他條條喺嗰邊食幾餐海鮮、報個幾日的本地團遊吓著名景色甚靚的黃石公園、班芙等地點...。不過, 這個如意算盤唔知使唔使要等大人被炒或者都退埋休先打得響咯...

做工難免有時會覺得勞氣, 大人同我呻之時(其實佢好鍾意份工的), 我就講笑咁講, 慫恿佢不如唔撈。那我們就可以隨時在不是旅遊旺季的日子, 揀些好玩、抵玩而自己經濟能力可及的地方去吓...。班舊同事以前常叫我們一齊去坐郵輪, 說人多有伴會比較好玩。他們有熟人報料, 常吼到一些平到不可置信的行程。無奈那些行程總不會是在暑假的哩...

加國東岸的熱門旅行路線, 想去的我們大都去過了。至於美國境內的地方, 大人就祇去過比較近加拿大邊境的一些城鎮, 例如波士頓、匹茲堡、水牛城等...。今次行程中的紐約、華盛頓等大城市, 大人未到過, 應會有新鮮感。這個團有嘢睇、有嘢買、又在大西洋賭城住一晚...; 所以大人鍾意。

這是條熱門旅遊路線, 幾乎間間旅行社都有辦。 我揀這間是因為祇有佢哋啲旅遊車有WI ~FI。這類巴士團坐車的時間頗多, 在車上可以上網就唔使咁悶, 有啲細藝.; 到時有需要應該可以在途中兼顧份工啲嘢, 唔使心掛掛、囉囉孿! (唔知酒店有冇呢...?)

不過, 電腦盲有些少擔心, 到時用起上嚟, 都唔知掂唔掂架...