蛇踪出現至今整整七週。
週前最嚴重時試過幾次洗頭之際或洗完不久就出現快閃劇痛 ~
痛至那要命的爆炸點時設若持續痛耐尐或致失禁的那種程度。
連續不斷服食止痛藥(不敢停)至今情況似乎有些改善，
那半邊頭額、魂精痛到標冷汗的閃痛痛感目前暫時沒再發生。
如今是痕痕、痺痺、痛痛和繃繃緊等的諸 "感" 交集，
不爽之中還好尚捱得過去；
只不知這是孖藥合成的消炎及止痛功效還是神經線自我緩慢復元的些許進展。
之前的閃痛造成了一定程度的心理障礙，
擔心停食止痛藥之後不知會否故 "痛" 復萌。
如今洗頭仍都戰戰兢兢，
要擇時辰 ~ 盡量揀在食完止痛藥之後那一兩小時內為之。
洗頭手勢輕重操之在己都戰戰兢兢，
要去剪髮就更騰雞了。
早前打算等好番唔痛乜滯才去修理一下，
可等下等下...，復元進度緩慢。
而髮腳愈厚愈長，
髮色則愈見斑駁；
加上近來不時痕癢難當遂以十指狂搔致光明頂上餘下的蕪亂弱草買少見少...，
真箇一醜兼百拙，
真箇一醜兼百拙，
連尐頭髮都搞到自己週身唔舒服。
C就C喇，
今日終於忍無可忍、唔理三七二十一去剪之而後快！
預約時間(就時間食完藥不久就去剪, 之前又要食尐嘢才食藥...)，
去到師傅三下五落二，
單剪十零分鐘就已搞掂。
沒特別交帶師傅梳、剪右邊時小心放輕 ~ 諗住真係好痛時才出聲。
回家即洗復在忐忑中如常略為著色，再洗...。
幾番 "刺激"，幸好順利度過。
現在個頭當然未致於舒服晒，不過剪完個髮就真係痛中覺得幾 "輕" 幾 "快"！
^-^
搞搞下，原來幾近兩月 ..... 佳境已入，光明在望 ;)
回覆刪除頭尾近兩月猶未收科, 不知伊於胡底哩...
刪除幾年前我有飛蚊，成日有粒蚊跟住眼球轉動，煩不勝煩。嗰時朝朝瞓醒，習慣望住天花，希望粒蚊消失。得閒就成日將眼球轉來轉去追住粒蚊，神經兮兮。後來驗過眼無事係退化，惟有與它共存，整整下粒蚊自動移左位，離開視線範圍內，感覺便好好多，依家有時都忘記有飛蚊這回事。你額頭已轉痕，相信神經線發炎已接近尾聲了，條蛇已遠離你永不復來。呢輪多啲休息，我覺得寫大字練書法幾有幫助，分散下精神又可怡情養性，唔好成日聚焦在患處，一定會好番晒的，不用擔心。
回覆刪除懶性之人貪方便, 先在這裡祝HING姐新年快樂、健康如意! :)
刪除我隻左眼年前都試過類似情況, 忽然發覺成日好以有尐頭髮抑眉毛垂落嚟遮住視線, 揸揸下車都不自覺會用手去撥, 想撥番上去, 哈。
那時驚唔知係咪視網膜有事(一貫驚青嘛), 搵白袍老友, 話係眼球尐 "廢物" 嚟, 遲尐整整下就會移往兩邊眼角而 "消失" 於視線之內...(大意)。既然如此, 就心安理得唔鬼理佢, 之後果如所言。
早兩日剪髮和自行著色及洗頭輪番刺激, 神經獅幸無如前咆哮, 昨天已開始停服一日三次那種止痛猛藥(食了幾個星期, 滿口痱滋...), 只仍服每晚臨瞓前三四小時食一粒的那種(幫神經復元的?)。白袍老友大手筆原本開了90粒夠食3個月, 但在藥房攞藥時謂政府的醫管機構只批准逐月(30粒)咁攞, 其餘60粒暫作REFILL, 食完可以再攞(或因自己攞藥免費?), 如今只食剩10粒8粒, 諗住下星期尾又去會一會白袍老友。因為上次佢放假前叫我食多個零兩個禮拜就可以停食止痛藥(所以說似乎一切皆在白袍老友估算之中 :) ), 當時懵懵地, 冇問是否兩隻藥都一齊停。若那隻每日一粒的仍要食(所以開3個月?), 順便去攞埋。
近來都盡量瞓得就瞓, 只要那要命的閃痛不復再, 其餘的諸般不適尚可捱得過去。"病來如山倒, 病去似抽絲", 自己亦心中有數。有白袍老友鐵口判詞, 自己也不太擔心, 不過係腌悶一些而已。雖荒廢書法多時, 唯仍可網照上, 馬照跑, 嘢照食(最衰係尐痱滋), 覺照瞓, 精神情緒應該OK的。
再要多謝慰解。:)
今次生蛇一役，你都食左幾多藥喎。
回覆刪除剛醒。 :)
刪除的確唔少。
可能自己年紀大, 病發後又錯過了最佳服藥時機, 所以病情相對嚴重和復元較慢, 冇辦法喇。停了一日三次那隻止痛藥幾日, 口腔痱滋好番好多, 出口方面亦見改善。 XD
Good! 果然日有進展，漸入佳境。今次當打左場勝仗啦。
回覆刪除約了星期四再去睇白袍老友, 問下是否全部停晒藥的疑問, 並聽下佢點講。 :)
刪除