疑雲

去年某次見白袍老友時，姑娘突擊量血壓(並非次次量)，赫然上壓(15X)、下壓(9X)、心跳(100上下?)乜都高 ~ 見到尐數字自然頗吃一驚，加上唔舒服，當時幾乎暈得一陣。一向以為自己血壓勉強還可以而僥倖未中呢瓣的我，事後難免有尐忐忑。

自己比較驚青，當時(去年中)借了部量血壓機回來心血來潮就量一次。係心跳有時偏快之外，血壓基本上仍在可接受的 "正常範圍" 之內(?)。隨機持續量了差不多兩個月，留了記錄以備 "不時之需" 就暫時當冇嘢。

嗣後去幫襯仍然並非次次會同我量，唯每量則必高；白袍老友那時始終沒說甚麼。

有次去睇感冒(?睇親多數係呢味...)，白袍老友失驚無神忽然..."同你量下血壓喇..."...。個心登時打個突，心忖..."噫，來了..." 。

"血壓有尐高喎..."
"喺呢度量就幾次都高...，早幾個月喺屋企自己量過一排，冇咁高的..."
"下次嚟再量下，睇下使唔使做嘢..."
"哦......"

去年梢聖誕前領了大鑊流感(? ~ 今劑久咳的源頭...)，因白袍老友放假關係，自己要拖到一月初才去報案食了劑抗生素及繼續睇咳。事前姑娘又同我先量血壓(如今是否已列入每次必量的客戶了?)，嘩，接近160/100/10X，睇見讀數個心似乎更加跳得快咗尐...。

入去同白袍老友講完病情又再同我量血壓。(起身、剝衫連串動作，郁來郁去，加埋...緊張，唔高先奇...)，都係差不多高，連續撳了三次機...。舊事重提，說要同我跟下尐血壓嘞。
"你返去做三個星期左右的血壓記錄，每日在固定時間量一次，隔三幾日就分開不同時段量夠四次，你嘅心搏亦偏快，到時可以睇下血壓和心搏在不同時段的變化。.....下次帶埋尐記錄同部機嚟，睇埋你部機準唔準，就可以知道你的血壓是否見到我才特別高......   。"
"哦......"

噴氣管藥今週應該用完，咳仍未完全清晒。今日去睇多次，順便交功課；當然記得拎埋部量血壓機。

姑娘先同我量，148/96/110..."你唔好睇住嘛，個心咪冇跳咁快囉..."。脹然。

今日人少，好快到我。

自己訴完咳情，白袍老友起身同我聽前聽後(好似聽埋個心?)
"個肺好清吖，呢尐咳有時要4-6個禮拜先好..."
"尐噴藥應該今個星期用晒..."
"我寫多劑畀你..."

"拎咗部機及記錄嚟跟埋尐血壓..."

"好吖，你擺開檔攤先"......"你自己量一次..."
白袍老友(目及)住我的動作...(睇下有冇做錯致量度不準耶?)...，然後睇埋兩份記錄...。
自己部機量出 15X /10X/10X (同姑娘度的差不多 "高"，今次見高而喜，哈...)
白袍老友再用佢部機同我量一次，兩機讀數大致相若(係同一牌子的機)。即是自己去年和今次做的記錄在他眼中算係準的 ~ 而那些記錄都未算屬於 "高血壓" 的範圍。大人問點解我尐心跳咁快，白袍老友說心搏不逾100仍 "算" 正常(若是有埋血壓高恐怕就唔同講法了吧?!)，不過就叫我做 "密" 尐帶氧運動，等個心比較適應...。我話我近來一個人會打下籃球，不過呢排就打唔到啫...^-^ )

這團疑雲消散，暫時 "一天光晒" ；尐咳相對濕碎嘢嚟啫。隨即過隔離藥房攞藥，然後去洗車，跟住欣然赴飯約去也...。