大人的同事家裏開餅店，過年賣埋油器角仔，中秋當然賣月餅。
說要送個月餅給大人吃，問喜歡乜? 哈，有得揀...
大人要了個四黃蓮蓉 ~ 四個蛋黃，究竟裏面還可以有幾多蓮蓉呀? 大人...
月餅一向愈多蛋黃賣得愈貴，居然亦普遍為人受落，生意人的算盤認真精刮。對此自己常不以為然，覺得有尐捨本逐末。私意雙黃已經足夠。
不過呢，反正多年以還，就算老字號的月餅裏面所用的蓮蓉相信已經不 "純淨" 的了...；那蛋黃和蓮蓉兩者的成本可能都差不多。
下星期剪綵，到時才看看內裏乾坤...
---------------------------------------------------------------------
昨晚進了不少毒物解饞，宜乎比平常吃多一些...生果(相片誤刪了) :P
都係鍾意雪糕月多D...:P
回覆刪除我都係吖; 不過人地送的, 也不好強人所難嘛 ;)
刪除5蚊三隻咸蛋,名牌月餅又盆滿砵滿,係傳統的被人閹.
回覆刪除以前據說名牌酒樓單靠賣月餅, 已搵夠成年皮費; 月餅之好賺, 可見一斑。
回覆刪除呢邊香港來的月餅賣三、四十蚊盒, 但有尐卻賣十蚊左右...
事實上, 傳統月餅的銷量現在應該比我地靚仔差好遠了。
今年同事CK自製迷你奶黃月和白蓮容月，有板有眼，有心有閒的話，自己玩下都過癮﹗
回覆刪除不聞故人消息久矣!
刪除有心有閒 ~ 喜歡學乜相信當中都有樂趣...
早年見家有焗爐, 自己為食, 反正爛斯得閒, 曾經想依照菜譜試下整諸如焗豬扒飯或是葡國雞飯(得就諗住可以進而整餸! 哈哈...)之類的簡單嘢食, 同大人提過吓, 卻冇乜反應, 於是冷卻了下來...
傳統月餅的毛利固然高，冰皮月餅仲好賺，今年有朋友送我一張榮華冰皮月餅券，憑券取兩個。嘩小小的一個要成16元一個，自己整成本真係唔駛3元。
回覆刪除先幾年我也整個冰皮月餅，好易整，去專門烘焗店買現成的預拌粉，口味則自己揀，例如豆沙、蓮蓉隨意配搭，再買一個月餅模，依住步驟做即可，多數成功的。中式傳統月餅其實也不十分難，功夫則較多。我也學整過一次，幾好玩的。
哈, 新竇重逢, 喜何如之!
回覆刪除我和大人都不大好傳統月餅, 得兩個人, 向來不會買整盒來食。尤其現在的蓮蓉都唔知係乜溝的, 印象沒以前的咁香咁好食。在我眼中, 月餅是JUNK FOOD, 又貴又傷身, 又不太啱口味, 免得過費時嘥錢以及浪費自己的QUOTA, 哈哈。
以前或有家長會送盒給大人, 我地留起一個就算, 其餘都拎去弟弟處。
癮起反而會買盒細庒冰皮雪糕月餅, 當雪糕食。任佢賺晒, 不外幾蚊。
唔怕做功夫, 自己整嚟玩下倒不錯, 整得好食, 送尐畀人, 自己留少少嚟食, 甚有滿足感。
我都係咁話，月餅從來不是我所嗜，記得兒時食月餅，同我老豆是最佳拍檔，我只食蛋黃，我老豆就只食蓮蓉，於是切開的月餅件件有個窿，俾我食晒啲蛋黃。一年容易又中秋，在此祝你同大人中秋節快樂，人月兩圓!
刪除大家咁話...中秋節快樂! :)
刪除http://ahsokt.blogspot.com/
回覆刪除我在金宝湯那裏找到了你
蘇蘇, 先多謝你咁有心, 尋訪而來;
刪除搞成咁, 當中實在有些曲折... :P
不知如何, 我的舊BLOG在十天八天前(好像由9月2日開始)出的新篇甚至我覆網友的留言, 只自己睇到, 網友就已經完全睇唔到(我LOGOUT後入番去, 自己都睇唔到!)。我都未做BACKUP, 何解...
期間我出過兩次(篇)搬遷啟事, 亦覆過留言交代去向, 可是都未能現於各位網友眼前(?); 我甚至在舊料當眼處加一段, 就連該篇舊料都隱埋形。費解之至!!
對無從及時通知大家搬來這裡, 很感抱歉。
好在蘇蘇醒目, 自己識搵到嚟。那以後就常來謦幾句罅...
稍後過去你處看看, 希望有尐驚喜。 :-)