冰雨 / 燒鴨瀨

上週二的 -29度C, 原來是兩年以來的最低紀錄; 難怪。
近幾天氣溫逐漸回升, 未來一兩日還會見番正數。

太凍又弊, 凍凍吓暖番啲都弊...

今早冰雨, 馬路甚跣。自己一向怕麻煩, 也恃著自己都算小心和技術尚不差, 部車冬天沒換雪胎 ~ 全天候用那所謂的四季胎(其實雪胎都不是實掂)。

今朝知道有冰雨警告, 出門已小心翼翼。不過路面情況確實惡劣, 上面有雪而底下可能在晚上結了薄冰..., 於是有時想跴停架車都未必得心應 "腳"。
大人見我有時尤其轉彎揸到左搖右擺, 停車又停到 "格格" 聲都未完全停到, 相信都...。嘿, 久不久讓她在旁邊見識一次這樣子的場面都好, 待她以後有機會自己揸都不會掉以輕心。

新聞報道說今天大大小小的交通意外和向汽車會求助者都各逾千宗...



送完大人返工, 自己去食個沙爹牛肉意粉早餐, 歎番杯港式奶茶; 停車場都冇車乜滯...
食食吓有個客走了之後, 得番我一個, 侍應姐姐笑說我 "包場" ...



星期一接大人放工, 多數要送對同事母女回家; 今天還臨時加多一個幾歲的學生...家人接唔到佢放學喎...
於是全車滿座; 先送學生返歸, 再送對母女
去到屋前路旁...要擔高頭望...哈, 暗叫大鑊, 原來間屋的門口設在一條 "陡斜" 的窄小車路之上, 條斜路仔都沒剷清晒雪, 而且又唔知有無冰...
個心十五十六 ~ 架車唔知上唔上到去添...
硬著頭皮轉上去喇...真係好似跣跣哋...停好晒都下意識咁仍然跴住個腳掣, 驚架車溜後...(其實若是因為有冰架車溜後, 跴都冇用)

噓, 真係暗中...




---------------------------------


送完又要去圖書館...

返歸途中買了半隻燒鴨
屋企有包新鮮瀨粉