朋友日前送了張差不多到期的賭場餐券給大人，反正她從未踏足那間賭場，於是趕在五月十九日，趁維多利亞日公眾假期那天去了。
事前訂好乘搭下午一時去賭場的旅遊專車(來回車費十元)，在一個華人商場集合出發。該日早上約了法師、金礦及星仔玩網雀，撐着睡眼，全神投入地玩著玩著……至漸入佳境之際，原來不覺已時交正午，雖戀戀不捨，也要匆匆收檔，立即駕車前往商場搭車。
那天是公眾假期，法例規定一般商場店鋪需要休業。不過該華人商場屬指定的遊客區商場，可以豁免。於是人都湧到該處逛，兜了幾轉也找不到泊車位。時不我與，望著旅遊車開走，終於錯過了預訂的班次。為免掃興，便改搭三點鐘的下一班車。車程個半小時，早上玩雀沒睡早覺，趁機在車上 “恰” 了一陣，略作補償。
近年香港有不少歌星輪流過來走埠搵加幣，這個華瑪賭場是其中一個主要表演場地。
賭場內諸色人等俱有，長者尤其不少。許多年邁又行動遲緩以及一些需坐輪椅的人，都喜歡玩老虎機消遣。他們靜靜地、懶懶地坐在老虎機前隨意慢慢消磨時間，注碼竟有小至2¢一注(不過左右斜直搭配之下，每按一下起碼十數注以上)。賭場內有幾張賭大、小的枱，吸引許多華人下注。下次有機會我想落場玩幾手，也會以此為對象。
場內有各式飲食，倒是方便得很。我們選擇吃自助餐，因為免費餐券價值剛夠兩位之數(須另外放下幾元小費)，又貪其吃得比較自由。自助餐當然是一般貨式，卻不太差，至少較上次美食節一日遊的中式自助午餐好得多。用餐時間只限一小時，排隊都已花了差不多三十分鐘才能入座。賭場的策略當然是希望客人多些時間留連在賭桌不斷進貢，所以豈會提供精美的食物，以及任由客人長時間磨在吃喝方面而荒廢 “正事” 呢？這點可以理解。
根據入賭場去程的時間，本來指定晚上十時回程，不過可以在櫃枱輪候早點班次的後補名額。吃完自助餐後，提早乘坐八時的回程車，和賭場沒有絲毫錢銀瓜葛，不致執條襪帶累身家。
這是家居附近的華人商場，平日人流已很旺。維多利亞日公眾假期其他商場休息，更加擁擠，車位難求。
華瑪賭場(CASINO RAMA)路標
不知此中有否隱含 "風水" 煞氣？
停車場
旅遊專車
大型貴賓車(LIMO)
門口人流熙攘
去程途中
回程夕照
最後幾張，學到攝高Ｄ慢快門、手郁技術喎﹗
回覆刪除回程夕照 ---好藝術喎﹗尤其“夕照”的第一張，好有寶麗萊feel，(手查)緊車都影到相﹖
回覆刪除噫, 乜兩位咁夜都未瞓? 部機好在乜都唔駛較(因為我唔識較, 哈哈!), 見到就(手禁), 影到出黎乜就乜, 乜FEEL都唔曉 , (乜野叫寶麗來FEEL?矇矇地呀???)有都係撞啱, 完全沒有理論支持, 純粹撞手神。不過睇番果幾張, 自己都覺得唔錯 , 原來喺你地眼中都算有D水準架? 雖是無心插柳之作, 亦值開心。 我地坐旅遊車來回, 唔係開得太快, 喺車裏邊可以影吓外出囉。
回覆刪除Pacific Mall? Brought back a lot of memories!! The casino is kind of small, but I am sure they made a lot of $$ from the Asians in Toronto!!
回覆刪除[版主回覆05/25/2008 11:23:00]你不時上多倫多歎美食, 周圍玩, 應對PACIFIC MALL不會陌生! RAMA的確很細, 附近又沒地方行，除賭錢外冇其他野, 多年前我只去過一次, 都係冇賭到 ；瀑布的FALLSVIEW靚好多大好多, 新開之後, 我重未去過, 遲d搵次會去下, 行吓瀑布附近, 影吓相咁。 你工作那間賭場應該好大間? 年前曾遊美東, 到過紐約、大西洋城等...; 在大西洋城入過兩間賭場, 都靚過大過RAMA好多。
影相都唔使下下計住技術甚麼的，想影就影反而有意外收穫，所以有人話細路仔影相有時會好feel過d攝影師，佢地就係冇計算，鍾意就影，由於身高關係，視角又與成人唔同。 寶麗萊係即影即有菲林，已於今年停產，佢出黎d顏色睇落舊舊地，好似褪色咁，俾人唔真實 o既感覺。
回覆刪除[版主回覆05/25/2008 22:55:00]喺旅遊車影出去, 難免唔夠 "定", 又唔識調較快門(?)去就, 所以GM話有D手郁技術囉 。你就玩野故意為之, 我就技術如此, 奈何! 不過學你話齋, 我自己影相但求見乜影乜, 有野睇就OK, 工拙唔駛計較咁多者也。有機會你提點一二, 學吓野囉...。
係咪網雀失利個心囉囉攣，所以唔敢響賭場落注呀！
回覆刪除[版主回覆05/25/2008 23:00:00]哼, 多少啦!!!若果喺網雀贏一萬幾千(唔係分, 係蚊!!!), 有本錢自然遲走都博幾手。 入去巡吓個場, 排隊食自助餐, 出黎都七點有突, 八點有車, 咪嗱嗱聲走, 大人翌日要返工, 瞓仙起住返竇修煉也。來日方長, 有機會會去瀑布果間玩返次!!
好彩你無賭咋...唔係既話可能你又上癮架啦...大伯...
回覆刪除[版主回覆05/28/2008 16:14:00]我都驚自制力差, 所以唔敢輕易落叠架。
咁都已經證明你定力係夠架..大伯..不過玩開一次就....好難講
回覆刪除[版主回覆05/28/2008 21:16:00]哈哈, 都非完全因為定力, 因為覺得賭場內似乎除賭廿一點有些技巧, 其他純靠運氣(?)..., 自覺運氣麻麻, 而且呢瓣野虛無飄渺, 全不可靠, 所以咪費事自投羅網囉。 相對賭馬和麻雀, 賭馬仍有資料可稽(雖然刨都仍輸多贏少! , 因為還要拆局以及自己在賭馬方面存在的性格缺點有以致之!!!)奢望有日食大茶飯, 以 "小" 博大; 麻雀在某程度可控制在自己手中(計落最好成績係呢樣嘞!呵呵!!)，所以至今仍然玩吓馬仔及打吓麻雀, 小注怡情, 以戰養戰, 勉強可以苟延殘喘囉。
咁祝你財運享通,逄賭必勝 (隨左網雀.. )啦... 大伯
回覆刪除[版主回覆05/29/2008 10:20:00]有時殺得性起會失控架, 都忘記玩緊邊瓣, 只知要贏..贏..贏.....。 咁就請原諒吓LOR, 星DOY!
今年 d 馬仲未跑完咩？成六月路喎！
回覆刪除[版主回覆05/29/2008 12:31:00]重有十次八次喇。 而家跑到六月尾/七月頭架, 然後九月初又嗱嗱臨開鑼, 抖暑時間只得兩個月, 感覺好快好快, 似乎休養生息都唔夠時間!!(我講人呀, 尤其自己要儲番D本錢架嘛! 哈哈)
宜家馬會同政府搶錢搶到出晒面，為求有佣有稅抽，攪到七月仲要跑，遲 d 可能真係全年都跑都未定。
回覆刪除[版主回覆05/29/2008 14:45:00]而家懶刨馬經, 興趣已不及在香港時之濃; 賽期過密, 有時頗有點兒厭戰情緒矣。