高危的一餐------打邊爐

在多倫多出街打邊爐, 差不多全部都是任食自助火煱(有些落單、有些擺開任攞), 價錢約在$16-18左右。便宜是相當便宜, 可是便宜無好貨, 一般吃到的材料十分普通, 無乜野食。要吃得好一點, 又不怕功夫多, 有時喜歡在屋企打。尤其假如人多, 食物款式可以多些, 更乘機灌多幾杯啤酒, 毫無顧忌, 會痛快過癮許多。(出街食則通常只敢一罐之量, 因為飲完食完便要立即(手查)車番歸, 若飲得太多, 到時酒氣未過，不敢放肆。)

日前氣溫降至攝氏零度之下，正合圍爐滾食，於是糾集家人，合力整番餐杰野食吓…。

家人架撐齊備, 這是切牛肉機。

牛肉通常是打邊爐主角, 靚肥牛卻可遇不可求。平時行超市見到, 都會先行入貨, 放入冰格急凍，幾時想打就取出來解凍。切時不論手切或用機刨, 牛肉都應解凍至仍然略具硬度, 方易為功。

鮮螺片、龍蝦、羊肉片

肥牛、自包雲吞及街買魚皮餃、蝦...。今次的蝦是急凍蝦, 食味差得遠, 因為溫哥華游水紅蝦完全無貨, 欲購無從。

殼蠔(已起殼)、桂花腸及鯇魚腩…。若果平時兩口子, 大人會買條磅半左右青斑起肉, 比較好食, 兩個人啱啱好。......打邊爐前數日, 大人掛住一邊睇電視, 切南瓜時不幸將指尖切左一小忽, “調調FING”, 流血不止; 略為包紮立即趕去我地個家庭醫生度睇, 點知佢咁啱放假, 急到差D想去醫院急症室......不過又驚要等好耐。終於周圍撲去搵收WALK-IN的醫生, 搞到踢晒腳。大人養傷期間, 我做賓佬, 所以今次只好買兩個大鯇魚腩, 我都可以搞得掂。(希望呢餐佢可以補番D血啦!)

人多要用兩個邊爐煱; 其中一個鴛鴦煱湯底, 釀豆卜乃自製。

當日有好幾舊牛肉, 食完又切, 食完又切...其中以呢舊最肥、最正、最稔滑。食係好食, 恐怕太傷身, 呢碟只敢淺嘗。不過雖微饞人之力, 亦風捲殘雲, 好快掃清。 蔬菜全部另外擺開, 未入鏡頭。開動之前影完, 立即全身投入, 中途已唔得閒再影矣...!!