定律

前不久在商場見隻大浣熊半空懸攀在行人天橋通道欄外，
進退兩難，動彈不得。

之後有感而發，
記了一篇<熊之鑑>以警惕耆英已無復當年勇，
打波切要量力而為...。

警惕還警惕，然而一切可能發生的衰嘢遲早多數會發生的。
這算不算是梅菲定律(Murphy's Law)所說的.......。(?!)

星期四朝早天氣和暖，
衣衫輕薄操波遂玩得比較忘形投入。

在連串動作之中來一個凌空(其實彈高大槪3"-4" 咋) "華麗扭腰"(並非 "轉身"喎)...，
去接一個籃板球預備繼續走動上籃之際(模擬比賽嘛  :-D )，
覺得後腰不知何處緊扯了一下...。

當時心中一凜，一邊打一邊默察身體狀況，似乎尚未見異樣；於是繼續...。
不過到翌日星期五早上瞓醒就知真係衰咗了 ~ 又要就住彎腰就住行...。

------------------------

衰開就衰，錯開就錯。
(好多時買股票、買馬都係咁架罅...  :-D  )

今天午間送完大人去打波回來(香港時間星期日凌晨一時...)想印賠率做功課，
發覺唔只有賠率，連賽果都有埋 ~ 

發達咯，衞斯理的科幻小說故事橋段居然在現實生活出現耶???!!!

原來今期又跑禮拜六，脹然。

咁梗係當自己走晒寶、唔見咗十萬九千七架喇... :DDD

------------------------

剛才黃昏大人打波回來兩兜友 "撲" 出去蒲了三粒鐘 ~
並非搵食而係搵醫生睇。
(心情係撲，行動係趌。)

時維下午六時許，白袍老友已收工。
去附近兩處醫療中心想碰運氣看看還有冇 Walk in 睇，去到一樣收晒工。
退而思其次，不如睇跌打都好喇。

騰來騰去...

好在附近呢個醫師未收工，還有四五個人排住等睇，又肯睇埋......大人。

大人不知有否看過那篇<熊之鑑>，
不過看過與否根據梅菲定律都無關重要，
要衰的始終要衰。

我就凌空華麗扭腰(要用想像力 + 慢鏡才得所謂的華麗效果吧(?)) 整親。

大人重大鑊，
褪後DUN低(這動作應是狼狽而與華麗沾不上邊了)大力扯親小腿後面的肌腱。

趌到返嚟立即冰敷，

不過嗰舊肌腱就愈嚟愈實愈腫 ~隻小腿發脹勁過豬蹄，
"看來是肌腱裏邊撕裂出血..."，大人這才驚起上嚟。

自己從前痛風發作時有所謂寸步難行者，
痛處雖不同，大人嚐的大槪是差不多的那般滋味，或可能更甚。
今回還要四處頻撲搵醫生睇，更加衰多幾錢...。

醫師先用跌打酒稍為捽散傷處未浮現的瘀血，捽到大人依牙鬆弶，我見猶憐。
捽完用塊膠布上藥再敷，這就盛惠六十大元；呢劑正式係貼錢買難受。


"已非十八廿二，一週又至多只打一次，
不可打到忘晒形動作過份搏命激烈，否則好容易受傷者也。"

See? ...I told you...

這句英文乃是年前那次雙手血肉十指大戰厚甲八跪二螯...
導致一C一傷事件中大人當時對我說的... ^-^

 放高了的......肉腿横陳
星期一都唔知返唔返得工

------------------------

後記

拆藥。狼藉

星期一大人決定休息
看看可否約到白袍老友畀佢睇睇
然後再斟酌是否繼續往捽跌打

今晚又特登去借定番嚟
明天出街...大人多數要用...都唔知要用幾耐

 ---------------

 
今天(星期一)一早電約白袍老友跟手尾

問清楚點跌、點痛
仔細睇埋膝頭以下可以活動到怎麼樣的程度
圍著左右兩隻小腿最多肌肉處的 "圓碌部位" 度一度尺寸做比較(傷腳腫大了2")
然後白袍老友用手、大人用腳...大家鬥力  (鬥完立即洗手...) ^-^

"察言觀色"
感覺應該唔係太嚴重

雙英齊齊略略鬆了口氣

叫返去LONG(去聲)高腳、多尐熱敷傷處、得閒 "要" 郁下屈伸下尐腳趾和腳板
穩陣提醒埋要特別留意腳板萬一(!!)麻痺、變冷、無感覺 ~
就要自己立即去醫院急症室

開了止痛消炎藥
走得
"需要假紙就嚟搵我寫喇..."

大人打電話給校長至少要休息多一兩日...
自己呢幾日則已變身賓伯矣

夾柺 "英" 姿