豐彼吝茲

大人三月份的春假一向多應酬，
若非受約同人開枱就係去逛公司，
百搭之身通常總有三幾日唔黐家。

平時返工雙英還可以一齊食晚餐，

有粥食粥、有飯食飯，癮起就自助下添.... :-DDD。

假期大人一旦開籠放雀飛咗出去就肯定早出晚歸 ~ 晚到甚至半夜三更...。

自己雖然不時會單拖喺街食早餐或飲早茶，

不過午、晚兩餐就不喜歡一兜友出街搵食 ~ 因為頭岳岳都唔知去食乜好；

寧願摷雪櫃有乜就食乜。

所以大人諗住有那三幾日唔得閒應酬我之時，
會預先儲定及張羅多一些現成食物(餐餘)放在雪櫃，
等懶人可以簡簡單單 "整" 嚟食。

假期之初買了兩塊PRIME RIB喺屋企開餐

本來一塊咁大兩份都已經夠食
特意焗晒兩塊食剩作餐餘等我慢慢摵

間中飯堂有尐嘢拎走 ，
有晚又買了個三和菜返歸撐枱腳，
所以近幾日雪櫃擺到一兜二兜的 ~ 常滿了。

不過咪話...若果一日三餐，
好快就會畀我清得七七八八架罅。

-----------------------------

本身在公校教書的當年家長、如今波友一向與大人一齊放相同的假期，
所以兩人俱是 "課餘" 雀枱的兩支固定柱躉。

家長波友春假必主催約打兩至三場才夠頂癮，
大槪因為召了大人開枱而見令我落單，
早期成日叫我到時到候過去同佢地一齊食飯。

不過特登去食餐，食完又一個人走先(佢地會繼續作戰至深宵)，
自己覺得冇乜癮，食過三幾次就不再參與了 ~
節日的大食會有時才會偶然陪大人亮相一次。  :-D


大人用手機影番嚟的....呢個唔係晚餐
係佢地昨日射雀前的午餐 ~
午餐都食得咁鬼豐富
(晚餐掛住開枱反而求其耶?)  ^-^

 

大人今天一早又約了同事哨街
送佢去順便攞咭洗車
晚上接佢時還咭

自己今晚喺雪櫃執出嚟寒而還好未酸的自助碟頭晚餐

都唔錯架 ~ 菜式有...

焗牛扒(剪粒)、咖喱牛脷、涼瓜炒蛋、淥菜心、楊州炒飯+白飯兩溝
煙肉磨菇忌廉湯

雖是隔宿(s)餐餘
樣樣都依然幾好食

好過一兜友出街唔知食乜

美中不足的是
還有幾聲咳
唔敢飲啤酒住啫

 食完生蠔嗰餐翌日揈至上147
今日又見稍為回落