昨 "晚" 去了搵白袍老友...。
星期一通常特別多人, 早上十點零預約, 都要排到最後兩個---晚上七時四十五分, 從來未試過睇咁晏的。大人早兩天有些感冒(我都應該有啲...), 且愈咳愈密, 有喉嚨發炎的迹象, 早睇早著; 時間雖晚, 總好過辛苦捱多一日。大人去睇開, 我就順便攞藥, 及問問手指那無關痛癢的手尾...。
老友由十點開診(中午有小休), 睇到我哋仍然風騷醒神。睇最後也有好處, 知道後無來者, 老友唔使趕住趕住, 有時會有心情講多啲嘢...。
大人睇先, 要整劑稍強的抗生素---首天兩粒打孖食, 其後四天一日一粒。
我就攞尿酸丸; 並出示食指(好在並非中指
)讓白袍老友看看。月前右手食指底節有笪皮膚發紅、增厚、 略痕, 攞了些藥膏搽, 搽了幾個星期, 已經不痕, 但紅厚雖稍退, 卻未全消, 問老友是否尚要繼續搽用緊的藥。(潛台詞是...要否換過另外一隻藥的委婉說法..
.)
老友問我那指節部位會否常接觸以至磨擦到些甚麼物事? 我想不出所以然。有想到可能是揸隻老鼠, 但個位又似乎接觸面不多。大人忽然冒出一句, 會唔會係做運動時揸住平衡的扶手?我都木宰羊。講開運動, 白袍老友知道我是用 "快行" 的方式做運動之時, 就提議我改作 "跑" 較好, 我說一跑不久就會呼吸不暢, 佢話寧願校慢啲...。
近來之之佐佐, 沒精神又沒心情, 少去做運動。稍後且看可否的起心肝, 依照白袍老友的訓導去做......
手指痕皆因呢排少打麻雀之故
回覆刪除[版主回覆12/14/2011 16:01:17]我亦諗過是否捽得麻雀多...不過, 御用魚腩月前返港之後, 連家裏塘魚亦難湊兩枱之數, 呢排確實打得少...
阿大...早晨呀...:)....做完運動食番餐就唔怕手痕...^^
回覆刪除[版主回覆12/15/2011 11:28:36]MISS早晨! 說得是...那時是口痕啫..8-)
阿大...早晨呀...:)....口痕手痕都好...最重要係止到痕嘛....^^
回覆刪除[版主回覆12/16/2011 19:41:45]唔祇可以內服外敷, 而且似乎醫乜都得---看來真係神仙水嚟喎...8-O; 不過廣告既講... 味道芬芳, 更説鹹宜(唔會似的醃過籠的鹹雞咁鹹?)---鹹藥水罕見, 就算冇乜唔妥, 有機會都要買來試一試味。8-)))
[德肋撒回覆12/16/2011 16:11:04]跟據廣告所講:
法國雙飛人藥水味道芬芳 食抹鹹宜 功效神速 居家旅行 商店工廠 不可不備。
法國雙飛人藥水並具驅風救急、消暑提神功能，對屙嘔肚痛、舟車暈浪、牙痛頭痛、蚊叮蟲咬、湯火灼傷及消化不良均有效，內服外用效果優良。
主治︰傷風感冒、肚痛、嘔、蚊咬止癢、消化不良、燙火灼傷、牙痛頭痛、消暑提神、驅風救急、舟車暈浪、消毒止炎。
[版主回覆12/16/2011 14:51:23]哈, 多謝MISS介紹...我淨係識德國孖人牌...8-P 。乜呢隻嘢咁犀利, 外敷內服都得? 藥水(神仙水?)嚟架?? 唔知重可唔可以調理埋腸胃、止咳鎮痛退熱諸如此類, 若果得, 家居的藥庫就真係一樽搞掂晒。 8-))
[德肋撒回覆12/16/2011 14:00:07]阿大...應該買法國雙飛人...可以外敷內服...一樽攪掂晒....:P
[版主回覆12/16/2011 11:46:14]MISS早晨! 手痕可以搽藥膏; 藥膏忌入口, 口痕唯有去食餐; 但若不能正本清源, 去卻心癢, 始終常會復發的哩...;-)
起繭。
回覆刪除[版主回覆12/16/2011 16:04:00]若是因長期接觸磨擦而生的繭, 就諗唔明何以形成...
你大人猜的理由未嘗無理，下次做運動時試下戴對手套做，看看是否好些。年前我老公忽然腳趾紅腫，痛至不能行，以為是痛風，走去驗血又唔係。終於明白，原來佢日日攞部osim 按摩器碌腳，說明書有講明每次不要超過45分鐘，佢就超晒時唔識停，後來冇做按腳就冇晒事囉，哈哈 !
回覆刪除[May回覆12/17/2011 23:27:49]你講得啱呀，直情係過猶不及啦，部機有時間掣設定，之不過佢覺得唔夠味就成日restart，終於碌傷腳趾。初時我都幾鐘意碌下腳，覺得好舒服，碌得多感覺麻木了，現在部機已束之高閣，哈哈 ! 係呢，影儀隻百咳素是否好掂?
[版主回覆12/17/2011 18:04:58]雪櫃常有老友開的咳水食剩, 覺得唔妥就食定一兩次...
[shadow回覆12/17/2011 16:38:29]我昨日開始有d作咳，不敢怠慢，即啪百咳素，現在咳成的話，搞成個月，咳起來眼淚鼻水一齊黎....
[shadow回覆12/17/2011 16:35:34]May，過猶不及啊﹗
[版主回覆12/17/2011 04:04:21]這兩天做運動時都有留意指節接觸扶手的位置, 應該唔多似...。碌腳按摩好舒服的嗎..? 哈哈..
香港最近＞爆發抗藥性－金黃葡萄球菌，食肉菌，由社區感染。要勤洗手或帶備消毒濕紙巾或免洗手液。
回覆刪除[版主回覆12/19/2011 12:34:49]我諗自己都己經有多少潔癖的了...8-P
心痕要心藥呀,blogblog可以治癢止痕吧...
回覆刪除[版主回覆12/30/2011 00:08:55]在網誌自己通UP一通, 還可以和一眾新知舊雨閒聊幾句, 算是效用唔錯的心藥...8-)